Dy persona kanë humbur jetën në një seri të shtënash në universitetin kalifornian UCLA, në Los Angeles, në departamentin e inxhinjerisë.
Kampusi është izoluar menjëherë, raportojnë mediat amerikane, sipas të cilave të shtënat janë verifikuar në Boelter Hall, një ndërtesë shkencore.
Forcat e rendit po hetojnë. Në profilin në Twitter të policisë sinjalizohet që ka nisur gjuetia për vrasësin. Alarmi tek forcat e rendit ka mbërritur në orën 09:58, me orën lokale.
Gazeta e studentëve të kampusit, “UCLA Bruin” ka bërë me dije gjithashtu në rrjetet sociale se agresori është një mashkull i bardhë.
Ndërsa në një video të publikuar në Periscope janë parë persona që ecin në një trotuar dhe një zë mashkulli që bërtet përpara se filmimet të përfundojnë.
Ndërkohë, agjentët e policisë kanë gjetur një letër ku njoftohet një vetëvrasje dhe një pistoletë. Objektet në fjalë bëjnë të mendohet se bëhet fjalë për një rast vrasje-vetëvrasje. Por për momentin, hetuesit insistojnë se janë ende në kërkim të autorit.
TCH/d.i.
