Vendi i 13-të në Ligue 1 franceze është larg objektivave të Nantes në mbylljen e gjysmës së parë të sezonit.
Megjithatë, në klubin e “kanarinave” kanë arsye për të festuar. Reparti difensiv i skuadrës është një prej më të mirave të kampionatit dhe këtu kontribut ka Lorik Cana. Kapiteni i Shqipërisë vlerësohet se ka marrë një rol lideri në mbrojtje. Kjo është arsyeja përse 32-vjeçari kuqezi, ashtu sikurse edhe i gjithë reparti ku luan edhe përfaqësuesi tjetër i Kombëtares, Ermir Lenjani, janë cilësuar si një prej tre pikave më të forta të sezonit të Nantes. Vlerësimi merr peshë edhe më të madhe, pasi është bërë nga Pier Menes, nga një prej gazetarëve më të njohur sportivë në Francë.
Me pozicionimin e Lorik Canës në qendër të mbrojtjes, i gjithë reparti ka marrë tjetër imazh, ndërsa “luftëtari” jep gjithmonë shembullin e tij në fushën e lojës, duke shërbyer si pikë referimi, por edhe këshillues për futbollistët më të rinj të ekipit. Në 19 javët e para të sezonit, kapiteni i Shqipërisë është aktivizuar në 11 ndeshje te Nantes. Në të gjitha rastet Cana ka qenë titullar, ndërsa është zëvendësuar vetëm përballjen me Lillen, të luajtur më 29 shtator.
Supersport
