Drejtoria e Policisë së Qarkut Durrës gjatë natës së kaluar ka ndërmarrë një aksion në lokalet e natës, me qëllim kontrollin e volumit të muzikës në orët e vona dhe të sendeve të jashtëligjshme që posedojnë frekuentuesit e tyre. Gjatë operacionit janë shoqëruar 38 shtetas, teksa janë prangosur 2 te tjere.
Siç mësohet nga burime policore, kontroll është ushtruar në 7 lokale të qytetit të Durrësit dhe të Shijakut, të evidentuara si më problematiket. Si rezultat, janë shoqëruar në ambientet e Komisariatit të Policisë ne Durrës 22 shtetas, 15 prej te cileve janë balerina. Ndërsa në ambientet e Komisariatit të Policisë ne Shijak janë shoqëruar 16 shtetas, ku 4 prej tyre janë balerina.
Gjithashtu, ndaj dy shtetasve filloi procedimi penal për vepra penale të ndryshme. Konkretisht janë arrestuar Gëzim Aleksi, i moshës 39-vjeçare, në fshatin Xhafzotaj, Shijak. Ketij shtetasi, frekuentues në një nga lokalet ku u ushtrua kontrolli i lartpërmendur, iu gjeten dhe sekuestruan në cilësinë e provës materiale, një armë zjarri pistoletë e prodhimit jugosllav, kalibër 7.62 mm dhe një krëhër të vendosur në pistoletë me 7 fishekë kalibër 7.62 mm.
Shtetasi Gëzim Aleksi në vitin 1998 është dënuar me 25 vite burg për veprat penale “Rrëmbim personi”, “Vjedhje me dhunë”dhe “Krime kundër jetës” dhe është liruar në fillim të vitit 2015. Materialet i kaluan Prokurorisë së Rrethit Gjyqësor Durrës për veprime të mëtejshme për veprën penale “Prodhimi dhe mbajtja pa leje e armëve luftarake dhe e municionit”.
Gjithashtu, u arrestua dhe Shpëtim Meta, 19-vjeç, banues në Durrës. Gjatë kontrollit fizik atij iu gjetën dhe sekuestruan në cilësinë e provës materiale, 0.5 gramë lëndë narkotike e dyshuar e llojit Cannabis Sattiva. Materialet i kaluan Prokurorisë së Rrethit Gjyqësor Durrës për veprime të mëtejshme për veprën penale“Prodhimi dhe shitja e narkotikëve”parashikuar në nenin 283 të Kodit Penal.
Kontrolle të tilla do të vazhdojnë edhe në ditët në vijim me qëllim arrestimin e kontigjenteve kriminalë dhe parandalimin e prishjes së rendit dhe të qetësisë publike.
