Disa ditë më parë policia zhvilloi një operacion në gjithë vendin për të vënë në pranga të gjithë personat që dyshohet se ushtronin aktivitetin e palejuar të basteve online.
Në kryeqytet u zbuluan numri më i madh i personave që ushtronin aktivitetin e paligjshmë. Gjykata Penale e Tiranës ka zhvilluar seancën për caktim të masave të sigurisë për 19 të dyshuarit. Prokuroria e kryeqytetit ka kërkuar për disa nga të dyshuarit masën e sigurisë arrest në burg, për shkak edhe të materialeve kompromentuese që u gjetën në celularët e tyre por edhe gjatë kontrollit të lokaleve.
Organi i akuzës argumentoi se gjatë aksionit që u kodua “Gjysëmëfinalja”, për shkak se luhej Angli-Danimarkë, janë sekuestruar 15 kompujtera, 5 makineta për lojëra fati, 16 tableta që shërbenin për vënie bastesh, 8 tavolina pokeri, 15 DVR, 41 aparate celular, 5 milionë Lekë dhe prova të tjera materiale, të cilat shërbimin për ushtrimin e veprimtarisë së kundërligjshme të lojërave të fatit. Ndërsa pala mbrojtëse ka kërkuar masa më të buta të sigurisë.
Avokatët kanë pretenduar se duhet që të provohet që ato faqet online shpërbejnë për të vënë baste sportive dhe duhet një analizë e detajuar nga ekspertët e krimit kibernetik. Gjykata pasi ka dëgjuar pretendimet e paleve ka caktuar masën e sigurisë detyrim paraqitje për 17 nga të arrestuarit dhe për 2 të tjerë nuk ka caktuar fare masë sigurie.
/b.h
