Kryetari i Grupit Parlamentar të Partisë Socialiste, Taulant Balla ka reaguar pas ndalimit nga policia franceze të ish-drejtuesit të Partisë UMP në Francë, ish-Presidenti Nicolas Sarkozy, lidhur me financimet e dyshimta nga Libia në fushatën elektorale të vitit 2007.
Nëpërmjet një postimi në rrjetin social facebook, Balla i bën thirrje Lulzim Bashës dhe PD-së që të marrin të gjitha përgjegjësitë për financimin e paligjshëm në kohën e “Çadrës së Republikës së Re” dhe të lobimit për të nxirë Shqipërinë në insitucionet dhe mediat amerikane, gjatë fushatës zgjedhore të vitit 2017.
Sipas Ballës, Prokuroria nuk duhet të vonojë vendosjen e menjëhershme nën hetim të Lulzim Bashës, sa kohë që çdo ditë që kalon është një mundësi më shumë për prishjen e provave.
“Ish-drejtuesi i Partisë UMP në Francë, ish-Presidenti Nicolas Sarkozy u ndalua sot nga Policia franceze lidhur me financimet e dyshimta nga Libia në fushatën elektorale të vitit 2007.
Në Shqipëri, Lulëzim Basha dhe Partia Demokratike duhet të marrin të gjithë përgjegjësinë për financimin e paligjshëm në kohën e “Çadrës së Republikës së Re” dhe të lobimit për të nxirë Shqipërinë në insitucionet dhe mediat amerikane, gjatë fushatës zgjedhore të vitit 2017.
Burimet e errëta të atij financimi, ku përfshihen edhe xhepa oligarkësh ruse, janë një arsye e pashmangshme që Lulëzim Basha të ndiqet penalisht.
Prokuroria nuk duhet të vonojë vendosjen e menjëhershme nën hetim të Lulzim Bashës, sa kohë që çdo ditë që kalon është një mundësi më shumë për prishjen e provave dhe ka dyshime për përpjekje të Lulzim Bashës për të transferuar përgjegjësinë tek persona të tjerë”, nënvizon Balla.
a.ç
