Nga Denis Dyrnjaja
Në vigjilje të zgjedhjeve të 11 majit, kur demokratët presin të ndodhë rotacioni i shumëpritur i pushtetit, sikurse ka dalë dhe shprehja “është radha jonë”, del në pah një akt tradhëtie politike, përndryshe nga interesat e tyre. Është fjala për marrëveshjen e lobimit të PD në SHBA përmes kompanisë “Continental Strategy”, që duket se i shërben vetëm interesit të Sali Berishës dhe familjes së tij, por jo ardhjes së PD në pushtet apo largimit të Edi Ramës nga pushteti. Ja disa arsye. Kjo marrëveshje e menduar se do mbetej në një farë mënyre jo publike, përsa kohë që as aleatët e PD, por dhe strukturat e saj zyrtare, Kryesia apo Këshilli Kombëtar, apo dhe anëtarët e grupit parlamentar nuk kishin dijeni, është projektuar me një kohështrirje 2 vjeçare dhe vlerë totale prej 6 milion dollarësh dhe nuk kishte fare në objekt zgjedhjet e 11 majit.
Sikur të mos e kishte bërë publike kolegu gazetar Klodian Tomori, marrëveshja me një fondacion që krijohet në Amerikë vetëm një javë para nënshkrimit, lë hije të forta dyshimi për mënyrën, formën dhe qëllimin e saj. Të gjithë tani po pyesin si shpjegohet që të paguhet një shumë kaq e madhe prej 6 ml dollarësh, sikurse thuhet në objektin e kontatatës, për rigjenerimin e marrëdhenieve të PD me SHBA, në një kohë kur një shumë e tillë mund të përdorej për fushatën dhe nevojat elektorale që do t’i jepnin goxha hov opozitës në zgjedhje? Pra është fiks si ajo shprehja popullore “lëmë dasmën e shkojmë për shkarpa”. 6 ml dollarë nuk janë pak, madje dhe 750 mijë dollarë sa ç’është parapagimi është një shumë vërtetë e ndjeshme dhr e madhe për fushatën elektorale dhe rritjen e fuqisë elektorale të opozitës.
Atëherë përse këto para të “patriotëve shqiptarë” në Amerikë nuk u përdorën për të ndihmuar opozitën të fitojë zgjedhjet, por po na u përdorkan për të pastruar dhe rivitalizuar marrëdhëniet e PD me administratën amerikane?! Përgjigjja është po aq e kuptueshme dhe e thjeshtë. Grupit Berisha&co pra besnikëve shërbëtorë të tij, nuk i intereson fitorja e PD-së në zgjedhje, por pastrimi i figurës nga dizenjimi “non grata” në Shtetet e Bashkuara i bossit dhe familjarëve të bossit. Ndërkohë kjo nxjerr në pah edhe një qëllim akoma më meskin dhe intrigant, që përveç se Berisha e di dhe duket që parashikon humbjen në zgjedhje, projekton të vijojë kontrollin familjar të partisë edhe pas dështimit në 11 maj.
Statuti i PD i rishkruar nga vetë Berisha me suflerët e tij të skemave të manipulimit dhe manipulimeve politike në parti, parashikon dorëheqjen e kryetarit në rast dështimi në zgjedhje. Por kjo duket se nuk ka gjasë të ndodhë ose edhe nëse ndodh, partia mund t’i kalojë si trashëgim pronësor, brenda familjes vajzës së tij, pra znj Argita Berisha Malltezi, e cila nuk ka përjashtuar mundësinë e angazhimit të plotë në politikë, ndërsa i ati ka lënë të kuptohet se kjo varet në vullnetin dhe dëshirën e së bijës, duke nënkuptuar se akti i transferimit të drejtimit të partisë brenda familjes, mund të jetësohet pas zgjedhjeve.
Ndryshe nuk ka asnjë shpjegim që hidhen miliona euro për të pastruar figurën dhe statusin e damkosur politik të Berishëve në Amerikë kur në fakt pensioni politik është në prag. Kujt i duhet heqja e “non gratës” nëse PD nuk fiton zgjedhjet?! Sot SHBA drejtohet nga një administratë anti Sorros. Pyetja e natyrshme që vjen është: përse duhen paguar miliona dollarë për rehabilitimin e marrëdhenieve të PD me SHBA, nëse ndaj Berishës dhe PD paskërkësh patur një komplot të Edi Ramës dhe miqve të tij sorrosistë në administratën e mëparshme demokrate në Washington? Do të mjaftonte vetëm idea se ka ekzistuar komploti, që “non grata” për Sali Berishën, bashkëshorten dhe dy fëmijët e tij të zhbëhej. Por ata e dinë që implikimet e pretenduara në dosjen e Departamentit të Shtetit, janë të vërteta dhe janë përgatitur në fakt po nga administrata e parë e presidencës Trump dhe ekzekutuar gjatë administratës Biden. Dhe Berisha e di se kjo nuk zhbëhet politikisht dhe diplomatikisht, por mund të blihet financiarisht. Dhe për këtë ai dhe njerëzit e tij janë gati të paguajnë jo, 600 mijë apo 6 ml, por edhe 60 ml dollarë. Dhe kjo tregon se përveç vetes e interesave familjare, Berisha nuk ka asnjë qëllim tjetër sot për sot.
Ndaj demokratët duhet të kuptojnë se janë prerë në besë në iluzionin e madh të tyre, se Berisha po iu prin drejt rrëzimit të Edi Ramës nga pushteti. Ai thjeshtë po i përdor ata si materie politike, për hallet personale dhe trashëgiminë politike familjare. 11 maji nuk është dita e fitores, por është dita e tradhëtisë e besëprëmësisë së tyre. 11 maji duhet të shënojë dhe fillimin e fundit të përgjithmomshëm të çlirimit të PD nga uzurpuesit e saj të pavotuar dhe për më tepër të padëshiruar. Dorëzojuani partinë njerëzve të lirë, demokratëve dhe qytetarëve. Ata do ta gjejnë vetë liderin e tyre që nuk duhet dhe nuk mund të jetë më as një lider i sponsorizuar nga familja e Berishës dhe as shërbëtor i tyre.
Lideri ri duhet të vijë nga një proces i vërtetë i hapjes dhe demokracisë në partinë që i priu ardhjes së pluralizmit në Shqipëri. Ndryshe 11 maji do shënojë edhe vdekjen politike të Partisë Demokratike dhe vdekjen e palavdishme politike të atij që e nisi si themelues i PD dhe po e mbyll karrierën si pengmarrës dhe shkatërrues i saj.
