Vendosja e taksës së re ka vendosur një handikap të madh mes dy shteteve shqiptare.
Ende pa u përfshirë strukturat e shtetit kosovar në problematikë janë futur ne debat fillimisht vetë mediat në Kosovë që i kanë kushtuar hapësirë vendimit të qeverisë shqiptare për të vendosur tarifa për mjetet që kalojnë në ‘Rrugën e Kombit’.
Mediat kosovare shkruajnë se sipas një përllogaritje me tarifën minimale pesë euro, pasi ka edhe tarifa të tjera fitimet do të jenë afër 11 milionë euro në vit.
Por, kur shtohen këtu edhe pagesat për mjete të mëdha si autobus e kamion që tariforen më shumë, atëherë kjo shumë pritet të rritet edhe më. Për rreth 30 vjet pritet që fitimet e Shqiperise të jenë afër gjysmë-miliardi.
‘Rruga e kombit’ është e lëshuar me koncesion për 30 vjet tek një kompani turke dhe dy shqiptare.
Ndërkaq, lidhur me këtë ministri i Infrastrukturës ne Kosove Pal Lekaj, ka bërë të ditur për Telegrafin se është i interesuar që sa më parë të definohen gjërat sa i përket autostradave, duke thënë se do të merren parasysh modelet me të mira për zhvillimin e këtij projekti.
Ai nuk ka përmendur tarifën që Qeveria e Shqipërisë ka vendosur për kosovarët. Ndërsa, Safet Gerxhaliu, kryetar i Odës Ekonomike të Kosovës (OEK), tha se një taksë e tillë për autostradën do të gjenerojë shumë më tepër efekte negative se sa pozitive.
Ai sqaroi se ekzistojnë barriera të mjaftueshme në mes të një populli të ndarë në dy shtete, dhe kjo do të jetë një barrierë shtesë që do të godasë më së shumti kosovarët.
“Bashkëpunimi ekonomik në mes të Kosovës dhe Shqipërisë si dy shtete të një populli të ndarë nuk është në nivelin e dëshiruar. Ekzistojnë barriera të ndryshme qoftë tarifore, por edhe jo tarifore, të cilat e vështirësojnë avancimin e bashkëpunimit, prandaj fillimi i zbatimit të taksës rrugore do të jetë edhe një barrierë shtesë që do të godas më së shumti kosovarët pasi atë e vizitojnë Shqipërinë më së shumti gjatë vitit.
Kjo taksë rrugore do të ndikojë edhe në shfrytëzimin e shërbimeve të Portit të Durrësit, e me siguri do të ndikojë në koston e shërbimeve dhe produkteve që do të godasë qytetarët me ngritjen e kostos. Prandaj, një taksë e tillë do të gjeneroj shumë më tepër efekte negative se sa pozitive”, theksoi për Telegrafin Gërxhaliu. (Telegraf, Kosovë)
