Nëse doni të shkoni në Qafën Llogarasë, duhet të dini se prej vitesh një segment prej tre kilometrash në Dukat paraqet rrëshqitje. Autoriteti rrugor shqiptar shprehet se në këtë aks ka probleme dhe se rruga është korrigjuar përmes një riparimi të përkohshëm. Në një afat më të gjatë, parashihet që rruga të zhvendoset në një trase më të qëndrueshme. Prej vitesh kjo zonë ka pasur rrëshqitje të cilat kanë prishur shtratin aktual të rrugës.
Ndërkohë prej pesë vjetësh vazhdon të mos përfundojë rruga Lin-Pogradec, 17.6 kilometra e gjatë. Sipas autoriteteve zyrtare, në këtë segment po punohet intensivisht dhe tashmë është bërë shtrimi me asfalt në gjithë gjatësinë e rrugës. Është premtuar që rruga të jetë gati brenda muajit qershor. Të shohim sa do mbahet ky premtim. Një segment tjetër është ai mes Lushnjes dhe Beratit, i gjatë 32 kilometra. Kjo rrugë është shtruar e gjitha me asfalt, pritet vendosja e sinjalistikës.
