Kandidati i Partisë Socialiste për bashkinë e Elbasanit, Gledian Llatja shprehu bindjen se në zgjedhjet e 30 qershorit qytetarët elbasanas do t’i ribesojnë sërish Partisë Socialiste.
I shoqëruar nga Sekretari i Përgjithshëm i PS-së, njëherësh deputet i Elbasanit, Taulant Balla, si dhe nga deputetja Evis Kushi, kandidati Llatja tha se zgjedhjet e 30 qershorit kanë një rëndësi kombëtare, duke premtuar ndryshime të mëdha në zonën e Elbasanit.
“Në 30 qershor ne do të bëjmë zgjedhje ku do të lidhim kontratën me njëri-tjetrin. 30 qershori për ne është shumë i rëndësishëm, jo vetëm për bashkinë e Elbasanit, por edhe për mua si kandidat, që do të lidhë kontratën me qytetarët e mi për katër vitet e ardhshme, apo për këshillin tonë bashkiak, por është i rëndësishëm për gjithë Shqipërinë, për t’i treguar gjithë botës që Partia Socialiste është ajo që bën zgjedhjet model, që bën zgjedhjet më të mira, që ka forcën më të madhe mbështetëse në popull”, – shpreh ai.
Duke kërkuar mbështetjen e qytetarëve, Llatja theksoi se Partia Socialiste ka ndërmarrë reforma të rëndësishme shtetformuese për vendin.
“Ne jemi ata që kemi bërë reformat kryesore shtetformuese, pra ne jemi ata që shtetin po e bëjmë për veten tonë, për fëmijët tanë, për njerëzit tanë që të jetojmë të gjithë në një ambient sa më të mirë. Ne jemi ata që do të bëjmë dhe zhvillimin e zonave rurale, në bashkinë e Elbasanit. Falë punës shumë të mirë të kryebashkiakut Qazim Sejdini, si dhe falë Kryeministrit Rama në këto 6 vitet e fundit, Elbasani ka një transformim rrënjësor, është punuar shumë për të pësuar ndryshime si në infrastrukturë, siç është impianti i mbetjeve. Këshilli ynë bashkiak është më i miri që ne kemi patur ndonjëherë, për ne nuk ka patur ndonjëherë rëndësi se kush ishte kandidati përballë dhe nuk e kemi parë si armik tonin, ne po rikandidojmë për një mandat të katërt dhe do e fitojmë atë, pikërisht se kemi qenë dhe jemi më të mirët”, – theksoi ai.
/a.r
