Prokurori i Përgjithshëm Adriatik Llalla bëri me dije se javën e ardhshme pritet të nisë veprimet konkrete për verifikimin e integritetit të zyrtarëve të lartë të administratës në kuadër të atij që njihet si ligji i “Dekriminalizimit”.
Pas inspektimit që bëri në godinën e re të Prokurorisë së Elbasanit, Llalla dha një deklaratë për mediat ku tha se struktura për “Dekriminalizimin” tashmë është gati.
“Sapo kemi krijuar strukturën e posacme, javën që vjen vijon procesi i verifikimit”, tha Llalla.
Më tej ai ka komentuar edhe lëvizjet e shumta në radhët drejtuese të organit të akuzës. Sipas Llallës lëvizjet janë kryer për përmirësimin e punës pas disa analizave të kryera.
“Ato bëhen në funksion të organizimit më të mirë të punës, rifreskimit të stafeve ezistuese, që është gjëja më normale. Ndryshimet janë bërë pas analizave vjetore, Aty ku u kosntatuan problematika i’u kërkua drejtuesve të largohen. U përzgjodhën drejtuesit më të përshtatshëm”, vijoi kryeprokurori.
