Komisioni i Pavarur i Kualifikimit ka vendosur të ndërpresë procesin e rivlerësimit për ish-Prokurorin e Përgjithshëm Adriatik Llalla.
Vendimi erdhi pasi ky i fundit u tërhoq nga e drejta për të qenë gjyqtar i Apelit. Përmes një letre ai i kërkoi KPK ndërprerjen e procesit të rivlerësimit, kërkesë e cila u pranua sot.
Vendimi i KPK:
Komisioni i Pavarur i Kualifikimit njofton se trupi gjykues, i përbërë nga:
Roland Ilia Kryesues,
Pamela Qirko Anëtare,
Olsi Komici Relator,
Pasi mori dijeni për dorëheqjen e subjektit të rivlerësimit, z. Adriatik Llalla, më datë 12.02.2018, në zbatim të nenit G të Aneksit të Kushtetutës, vendosi ndërprerjen e procesit të rivlerësimit për subjektin e rivlerësimit, Adriatik Llalla.
Vendimi do të publikohet në faqen zyrtare të internetit të këtij institucioni në zbatim të afatit të përcaktuar në nenin 55/7 të ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”.
Ky vendim vjen vetëm një ditë pasi Sekretari Amerikan i Shtetit Rex Tillerson firmosi urdhrin sipas të cilit i ndalej hyrja në SHBA Adriatik Llallës. Ky vendim argumentohej me përfshirjen e ish-kryeprokurorit në afera korruptive.
/a.m.
