Kryeministri Edi Rama ka bërë me dije masat se si do të bëhet lëvizja e autorizuar ditën e nesërme.
Rama ka kërkuar që kompanitë të dorëzojnë në adresën e policisë rrugore listën me personat e autorizuar për të lëvizur. Kryeministri ka theksuar se do të ketë penalizime nëse personat e autorizuar marrin të tjerë në makinë.
“Ka një metodë shumë të thjeshtë në adresën policia rrugore as.gov .al, admistratori i kompanisë përkatëse duhet të dërgojë listën e të gjithë pjesëtarëve të personelit të nevojshëm për te qenë në lëvizje dhe të lërë hapësirën për vendosjen e numrit të targës nga vetë personi. Është një mënyrë e thjeshtë për këtë shpejtësisë që na duhet. Do të shohim nesër funksionimin.
Është e rëndësishme të theksoj do të ndiqet e njëjta mënyrë edhe për të gjitha shërbimet e medias, duhen të gjithë emrat në të njëjtin sistem. Nga ana tjetër edhe qarkullimi i automjeteve të personave më sëmundje kronike, me dokumentin e nevojshëm për trajtimin e tyre është i hapur, por është e rëndësishme që të keni një vërtetim të thjeshtë nga mjeku.
Më tutje sa i përket vajtje-ardhje në Rinas, drejtuesit duhet të kenë në dispozicion biletat e fluturimit, fotokopje të atyre që presin apo të atyre që largohen. Marrja në automjetin e punës nga këta persona që kanë liri në lëvizje të personave të tjerë të familjes, apo persona të tjerë është e ndaluar dhe do të sanksionohet. Ju lutem punonjësve që ta përcjellin edhe këtë mesazh sepse është shumë e rëndësishme sepse nuk po pengohen për qejf njerëzit që lëvizin. Shmangia e marrjes në makinë të njerëzve të tjerë është pjesë e këtij sistemi të mbrojtjes”, tha Rama. /e.s/
