Këtë të enjte, kryetari i Partisë Demokratike Sali Berisha ka vijuar turin e tij të foltores duke zhvilluar një takim me qytetarët në Mirditë. Këtë foltore të dytë, Berisha e konsideroi si “foltoren e jetës” së tij.
“Unë zgjodha Mirditën për të çelur siparin me foltoren e dytë, e cila, më duhet të them këtu, se është foltorja e jetës sime. Është foltorja e jetës sime, është foltorja për demokracinë, për familjen, për Shqipërinë. Në qoftë se në foltoren e parë ne së bashku, dhe s’e harroj kurrë pritjen tuaj, ne e shpëtuam Partinë Demokratike, po bëhej gjithçka që Shqipëria të ishte pa opozitë, ose më saktë me ka opozitë, po bëhej gjithçka që opozita të ishte stoli e një armiku të kombit shqiptar. E një armiku të egër të familjes shqiptare, qenies shqiptare, i cili quhet Edi Rama. Po, miq, në histori nuk ka një pushtues mizor, nuk ka një diktator, nuk ka një regjim që të ketë zhbërë shqiptarët, kombin, në dhjetë vite sa Edi Rama.”, tha Berisha.
Rama ka diskriminuar Veriun
Gjatë fjalës së tij, kryedemokrati akuzoi qeverinë e kryeministrit Edi Rama se ka diskriminuar Veriun sa i përket shpërndarjes së investimeve.
“Por ama diskriminim absolut që i ka bërë Edi Rama, Mirditës dhe veriut në tërësi nuk ja ka bërë kush kurrë. Para 5 ditësh po shihja një emision. Gazetarët po tregonin me dokumente se, si kryetari i bashkisë së Tepelenës, famëzi Tërmet Peçi, motra dhe i tij kishin përfituar 60 milionë euro tendera. Ju garantoj se të gjitha bashkitë e veriut të marra së bashku në 4 vite nuk kanë marrë 60 milionë investime nga qeveria. Një diskriminim, një lënie, e veriut i cili në prodhimin e përgjithshëm jep qindra milionë euro, kurse në shpërndarje shifni vetë. E ndaloi kohën, pa investime në Mirditë, në Shkodër, në Kukës, Tropojë, Peshkopi. 14 vite vazhdoi Rruga e Arbrit, dhe sa gjithsej 27 kilometra. 32 ishin të të përfunduara. Pra vetëm motra e Tërmetit kishte marrë nga vëllai i tij, apo rrethi i tij, 60 e ca milionë euro tendera. Ja ky është Edi Rama për mirditorët, ky është Edi Rama për banorët e veriut. Një armik, një armik në gen. Pse e them në gen, sepse Enver Hoxha e kishte në rreth të kuq veriun. E konsideronte zonë armike.”, u shpreh Berisha.
