Në kushtet kur në Shqipëri i ftohti polar ka pllakosur dhe pritet të pushtojë të gjithë vendin si dhe kur epidemia e gripit është në kulmin e saj, kryeministri Rama ka mbledhur në ambientet e kryeministrisë shtabin e emergjencave dhe ministrat për të dhënë detajet e deritanishme.
Kryeministri Rama i ka bërë thirrje qytetarëve që në këto ditë të kufizojnë në minimum lëvizjet nga shtëpia. Në lidhje me mësimin në shkollat e vendit, Rama ka theksuar se epidemia e gripit është shfaqur në shifra shqetësuese.
Më poshtë mund të gjeni videon për të shikuar LIVE mbledhjen.
Kreu i Emergjencave Civile Shemsi Premçi: Drejtoria e Emergjencave Civile ka marrë masat për mbarvajtjen e procesit. Aktualisht të gjitha segmentet rrugore janë të kalueshme. Deri në këto momente, rrugët nacionale dhe rurale janë të kalueshme. Janë disa rrugë në qarkun e Dibrës në Lurë dhe Selishtë që janë të pakalueshme. I gjithë territori tjetër është i kalueshëm. Situata e menaxhimit paraqitet më mirë në qarkun e Korçës, ku ka depozita të mjaftueshme kripe për të përballuar dëborën.
Përgjithësisht janë ngritur shtabet e emergjencave në të gjitha qarqet e vendit. Deri në këto momente nuk kemi asnjë ngjarje të rëndë për shkak të motit. Aktualisht po bashkëpunohet me kompanitë kontraktore që në momentet e ngjarjeve të rënda të jepet shërbimi.
Ministri i BrendshëmTahiri: Në 6 qarqe të vendit shtabet e emergjencave janë ngritur për të marrë masat e nevojshme. Objektivi jonë është më së pari që të mos lejojmë që të ketë humbje të jetëve. Situata parashikohet të jetë më e vështirë dhe ndaj kemi marrë masa që të kemi një shtim të numrave të personalit për të gjithë ata që do të kenë nevojë për ndihmë, bazë ushqimore e kështu me rradhë.
Po ashtu janë marrë masat për të ndihmuar njerëzit që jetojnë në rrugë, për shkak se ata janë dhe të parët më të pambrojtur. I bëj thirrje njerëzve që të mos dalin në orët e mbrëmjes. Duhet ndihma e qytetarëve që këto ditë të ftohta të kalojnë pa asnjë problematikë serioze.
/java/a.k
