Ish-kryetari i Kuvendit, Servet Pëllumbi, është përcjellë sot për në banesën e fundit, mes nderimeve shtetërore dhe pjesëmarrjes së lartë të figurave politike, familjarëve dhe qytetarëve.
Ceremonia e homazheve u zhvillua në hollin e Teatrit Kombëtar të Operas dhe Baletit, ku të pranishëm ishin edhe figura të larta të shtetit, si Presidenti Bajram Begaj, Kryeministri Edi Rama dhe kreu i Kuvendit, Niko Peleshi.
Pas homazheve që nisën në orën 09:30 dhe atyre zyrtare në orën 12:00, në orën 12:30 u mbajt ceremonia e përcjelljes sipas protokollit shtetëror. Kortezhi mortor u nis në orën 13:00 drejt varrezave të Sharrës, ku do të prehet trupi i tij.
Gjatë homazheve, personalitete të politikës shqiptare vlerësuan figurën dhe kontributin e Pëllumbit ndër vite.
Ish-deputeti socialist Arben Malaj u shpreh se: “Më ka inspiruar në jetë. Profesor Serveti ka lënë pas një trashëgimi të pasur, e para nga pikëpamja njerëzore, për thellësinë e mendimit për të majtën progresiste. Në politikën shqiptare nuk gjendet një i dytë as në të majtën dhe as në të djathtën që të ketë analizuar sfidat që ka vendi ndërmjet forcave politike dhe të ketë qenë inspirues për atë që duhet bërë më mirë.”
Ndërsa ish-deputeti Musa Ulqini e cilësoi atë si model parlamentarizmi: “Si deputet ishte shembulli i parlamentarit. Në kujtesën time, në vitet e gjata si deputet, do të mbetet si një nga kryetarët më të mençur, më seriozë të Kuvendit. Edhe në fund të jetës së tij ai la një gjurmë sepse publikoi gati 20 vepra, duke mbetur kështu një nga njerëzit më seriozë, më të mençur, një profesor i vërtetë.”
Deputeti socialist Erion Braçe theksoi ndikimin e tij tek brezat e rinj: “Mua dhe të tjerë si unë na priti, na mësoi, na edukoi dhe na rriti. Na mësoi mos të dorëzohemi asnjëherë për ato që janë bindje të drejta, ide të qarta. Për ne që kemi kaluar një pjesë të madhe me këta njerëz që kanë drejtuar Partinë Socialiste të Shqipërisë, nuk është e lehtë, është e vështirë. 35 vite janë një jetë e ndërtuar dhe e ndërtuar nga këta njerëz që kohë pas kohe po ndahen me ne.”
Nga ana tjetër, kreu i PR-së, Fatmir Mediu, vlerësoi figurën e tij përtej bindjeve politike: “I dha dinjitet Kuvendit të Shqipërisë. Padyshim kundërshtar, por etik, që në çdo moment kishte parimet dhe principet e veta që ndoshta ishin të ndryshme nga ato që ne kishim, por një kryetar që përcillte dëshirën për të bërë atë që ishte më e mira për vendin e tij. Meriton respektin dhe nderimin jo vetëm të deputetëve, por të të gjithë qytetarëve shqiptarë.”
Servet Pëllumbi u nda nga jeta në moshën 89-vjeçare, duke lënë pas një kontribut të spikatur në jetën politike dhe akademike të vendit, si një nga figurat më të rëndësishme të parlamentarizmit shqiptar.
Kush ishte Servet Pëllumbi
Servet Pëllumbi ka qenë një nga eksponentët kryesorë të së majtës shqiptare duke luajtur një rol mjaft të rëndësishëm në zhvillimet politike përgjatë viteve të demokracisë.
Ai lindi më 14 dhjetor të vitit 1936 në qytetin e Korçës dhe ka qenë figurë qendrore e politikës shqiptare, akademik dhe filozof, i cili shërbeu si kryetar i Kuvendit të Shqipërisë nga viti 2002 deri në vitin 2005.
Pëllumbi është vlerësuar si një nga personalitetet kryesore të Partisë Socialiste dhe shpesh cilësohej si “ideologu” i kësaj force politike, duke luajtur një rol kyç në transformimin e saj gjatë viteve ’90.
Përveç drejtimit të Parlamentit, ai ka shërbyer si deputet në disa legjislatura, duke përfaqësuar vendlindjen e tij, Korçën.
Servet Pëllumbi ishte profesor dhe doktor i shkencave filozofike.
