Florian Marku mbetet i pamposhtur. Kampioni shqiptar ka mundur me pikë pas 10 raundesh boksierin meksikan Miguel Perra.
Një ndeshje mjaft emocionuese nga të dy boksierët por në fund ka qenë shqiptari ai që ka fituar.
Me mijëra qytetarë kanë qenë të pranishëm në stadiumin “Air Albania” dhe me miliona të tjerë e kanë ndjekur nga ekrani. Marku ka fituar me pikë 96 me 91.
Ndeshja në “Air Albania” është bërë mjaft emocionuese ku Marku dhe Perra po grushtojnë vazhdimisht njëri-tjetrin.
Boksieri kundërshtar e ka rrëzuar në raundin e 8-të Florian Markun.
Nderkohe qe ne raundin e 10 dhe te fundit, serish Florian Marku e ka marre me vrull duke grushtuar fort dhe lekundur kundershtarin.
DUELI LIVE
Raundi 10 – Minutat e fundit shohin Markun të mundohet fillimisht të mbajë larg kundërshtarin në fillim e pastaj sulmon për të marrë një KO. Por në fund, shkëmbimi i grushteve nuk sheh asnjërin në tapet dhe tashmë pritet vendimi i gjyqtarëve.
Raundi 9 – Sulme nga Marku në këtë raund, për të balancuar goditjet që mori në raundin e 8. Megjithatë, të dy boksierët janë më të kujdesshëm për të evituar një goditje që mund të ishte fatale.
Raundi 8 – Ramirez tani është i ndërgjegjshëm që vetëm një KO mund t’i japë epërsinë në këtë sfidë dhe mundohet të gjejë hapësirë sulmi. Një gjuajtje me të majtën hedh Markun në tapet, por ai ngrihet përsëri shpejt dhe arrin të kundërpërgjigjet në raundin më të keq të kësaj ndeshje për të.
Raundi 7 – Marku nis ofensivën dhe me të majtën e tij lëshon një gjuajtje të fortë duke i shkaktuar një të çarë kundërshtarit në pjesën e djathtë të fytyrës. Më pas ai lëshon 2-3 goditje me të majtën, duke nervozuar kundërshtarin e tij që mundohet të kundërpërgjigjet në sekondat e fundit.
Raundi 6 – Marku fillon lojën e tij të zakonshme, duke sfiduar kundërshtarin që ta godasë. Ai eviton çdo tentativë drejt kokës së tij, teksa mundohet që të gjejë hapësirën të gjuajë kundërshtarin.
Raundi 5 – Ramirez është në ofensiv në këto momente, duke u munduar që të përfitojë nga gjakosja e Markut. Por boksieri shqiptar gjen mundësinë të kundërpërgjigjet dhe ndal ofensivën e meksikanit.
Raundi 4 – Pak sekonda dhe Ramirez është në tokë. Gjyqtari numëron edhe pse meksikani pretendon se është shtyrë. Më pas të dy boksierët përplasen kokë më kokë dhe Marku pëson një të çarë në vetull. Kundërshtari merr zemër dhe fillon të godasë më shumë për të përfituar nga fakti se Marku nuk ka shikueshmërinë e duhur.
Raundi 3 – Boksieri shqiptar gjen dy herë të çara në mbrojtjen e Ramirez, i cili kërkon duelin nga distanca me Markun duke mos e lejuar të afrohet. Por është tashmë boksieri shqiptar ai i cili ka iniciativën e plotë duke kërkuar sulmet e njëpasnjëshme.
Raundi 2 – Marku ia del të shtyjë në litarë kundërshtarin e tij, teksa përpiqet që ta godasë me të majtën e tij disa herë, por nuk e gjen të hapur.
Raundi 1 – Parra Ramirez është ai që ka iniciativën në raundin e parë, teksa mundohet të shtyjë Markun drejt këndit, pa shumë sukses. Shqiptari kontrollon me qetësi situatën duke pritur momentin e duhur për të goditur.
