Në Kryeministri është mbajtur sot më datë 23 dhjetor 2025, ceremonia e dhënies “Medalja e artë” për gjimnazistët me 10-ta në vend.
Rama ndau medaljet, duke thënë se gjimnazistët e shkëlqyer janë një shembull frymëzimi për shoqërinë.
“Kjo sallë tani ka më shumë tru se asnjëherë tjetër. Është një ceremoni tradicionale, që zhvillohet çdo fundvit. Është një nder për mua, që të vlerësoj rezultatet e njerëzve si ju. Shembujt janë shumë të rëndësishëm, që ta na nxisin që të ecim përpara në jetë. Shembulli juaj e bën shoqërinë më të mirë. Ju jeni shembuj frymëzues për shoqërinë, por edhe për mua personalisht dhe u jam mirënjohës për këtë”, tha Rama.
Ministrja e Arsimit Mirela Kumbaro gjithashtu ka përgëzuar gjimnazistët për rezultatet e tyre, duke u shprehur se suksesi i vërtetë matet me atë që bëjmë për të tjerët.
“Jeni 190 më të shkëlqyerit, por suksesi juaj i vërtetë do të matet me atë sesi do të përmirësoni jetën e të tjerëve, për të bërë gjërat më mirë. Sukseset nuk kanë ardhur tek ju, por keni shkuar ju tek sukseset që keni arritur deri më sot. Jo çdo gjë varet nga ne, por aty ku matet nga ne, do bëjmë më të mirën”, deklaroi Kumbaro.
Në total, 190 gjimnazistë të shkëlqyer në rang republike, morën medaljen e artë në Kryeministri.
