Prokuroria e Durrësit ka nisur hetimet për listën e zgjedhësve në qytetin bregdetar pas dyshimeve se listat e zgjedhësve janë shtuar fiktivisht me 2800 banorë.
Hetimet nisën pas kallëzimit të bërë nga Partia Demokratike, rreth dy javë më parë, ku PD hodhi dyshimet për shtim fiktiv të rreth 2800 personave, nga qytete të ndryshme në listën e votuesve për zgjedhjet lokale të qershorit 2015.
Po ashtu, bëhet e ditur se e njëjta gjë është konstatuar edhe në një raport nga auditi i Komisionit Qendror të Zgjedhjeve. Nisur nga këto dyshime, organi i Akuzës në Durrës vendosi të nisë hetimet për të verifikuar dyshimet e pretenduara në kallëzim dhe në raport.
Në njoftimin e prokurorisë thuhet se, “Prokuroria e Durrësit ka dërguar rreth 600 fletëthirrje në kuadër të këtij procedimi, nga të cilat janë pyetur rreth 60 persona banues në zonën e Plazhit, kryesisht ata që pretendohet që kanë dhënë me qera ambjente dhe shtëpi për shtetas nga qytete të ndryshme të Shqipërisë. Nga pyetja e këtyre personave, rezulton se ata nuk kanë dhënë shtëpi apo ambjente banimi me qera. Ndërkohë që hetimet po vijojnë, u krijuan dyshime të arsyeshme nga pyetja e këtyre personave se kontratat e qerasë janë fiktive”. Për këtë arsye, Prokuroria e Durrësit kërkoi në gjykatë kërkesën për caktimin e masës “pezullim nga detyra” për shtetasit Alfred Dhuli, drejtor i ndërmarrjes komunale të Plazhit, Bashkia Durrës dhe I. A., notere në Durrës, të dyshuar se kanë konsumuar elementët e veprave penale të “shpërdorimit të detyrës” dhe “fallsifikimit të dokumentave nga personat që kanë për detyrë t’i hartojnë ato. “Kjo kërkesë e Prokurorisë u pranua nga gjykata. Në argumentat e saj, Prokuroria kërkonte caktimin e masës, për faktin se kontratat e qerasë për 2800 personat, të dyshuara si fiktive, ishin nënshkruar nga drejtori Dhuli, të noterizuara nga noterja Aleksi. Gjithashtu, në vijim të veprimeve proceduriale, Prokuroria e Durrësit ka kërkuar në gjykatë sekuestrimin e listës së regjistrimit të këtyre personave në Regjistrin e Gjendjes Civile të Bashkisë Durrës. Kërkesa për sekuestrimin e kësaj liste është pranuar sërish nga gjykata. Në këto kushte, këta persona, nëse nuk janë regjistruar në listën e votuesve, nuk duhet të regjistrohen në Durrës.Por, në momentin që është bërë kallëzimi dhe ka nisur hetimi, 2800 personat e regjistruar fiktivisht ishin të përfshirë në listat e votuesve të qytetit Durrës dhe për këtë arsye, Prokuroria e Durrësit i ka dërguar njoftim Komisionit Qendror të Zgjedhjeve për t’i hequr nga lista e votuesve, si edhe Drejtorisë së Përgjithshme të Gjendjes Civile për t’i hequr nga lista e banorëve të qytetit Durrës”,thekson prokuroria.
