SPECIALE JAVANEWS/ Në këto ditë debatesh të forta për sistemin e drejtësisë, fati i paketës kushtetuese të reformës duket sikur lëkundet në harkun e disa orëve, nga votimi i sigurtë, tek bllokimi i pashpresë. Janë humore që lëvizin me shpejtësi, kryesisht për shkak të rezistencës që po bën opozita shqiptare, për të çeduar nga ndarja e vendeve në organet e reja të drejtësisë, sipas skemës “KQZ”. Një format i cili ka sjellë sherre dhe konflikte në tryezën e zgjedhjeve shqiptare prej vitesh, duke e ndarë këtë institucion sipas parcelave partiake.
Ka vlerë në këto orë të shihet sesi është e organizuar drejtësia që kemi sot. Ajo për të cilën as PD, apo edhe LSI, nuk kanë thënë asnjë fjalë dhe nuk kanë bërë asgjë në dekadën e shkuar. Sot kreu i opozitës Basha dhe ish-kryeministri Berisha flasin nga mëngjesi në darkë për kapjen e drëjtësisë nga politika. E thonë këtë gjë për një projekt i cili ka përfshirë tashmë kriterin e votimit me dy të tretat për anëtarët jo-gjyqtarë dhe jo-prokurorë, në institucionet e reja të drejtësisë. Megjithatë nuk kanë thënë asnjë fjalë të vetme, madje janë bërë barrikadë, për të mbrojtur sistemin aktual, i cili siç do të tregojmë më poshtë, ngrihet mbi votime që nga ana numerike përbëjnë një fyerje për logjikën elementare të shqiptarit të sotëm.
Sistemi që kemi (e për të cilin Basha nuk ka asnjë ankesë), është thuajse i gjithi i votuar në kohën e qeverisjes së djathtë dhe me shumicë të thjeshtë parlamentare. Kreu i Gjykatës së Lartë Zaganjori është zgjedhur me 72 vota në vitin 2013. Po ashtu, me shumica qesharake (krahasuar me projektin e ri), janë zgjedhur anëtarët e Gjykatës së Lartë Artan Broci (71 vota, prill 2013), Tom Ndreca (71 vota, prill 2013), Admir Thanza (72 vota, 2013), Edmond Islamaj (71 vota, 2012) apo Andi Çeliku (72 vota, 2008). Imagjinoni debatin e tanishëm ku nuk pranohen 94 vota për t’i votuar këta gjyqtarë dhe ku njëkohësisht heshtet për ata që janë zgjedhur në atë post tashmë me 71 apo 71 vota.
E ngjashme paraqitet situata edhe në dy organizmat e tjerë të gjyqësorit, KLD dhe Gjykatën Kushtetuese. Tre anëtarët e votuar nga Kuvendi në Këshillin e Lartë të Drejtësisë, përkatësisht Vangjel Kosta, Albana Shtylla dhe Artur Çomo, janë zgjedhur me 71, 77 dhe 76 vota gjatë qeverisjes së majtë.
Ndërkohë, Gjyakata Kushtetuese, anëtarët e të cilës janë zgjedhur të gjithë në kohën e dy qeverisjeve të djathta 2005-2008, janë votuar të gjithë me më pak se 80 vota të Kuvendit të Shqipërisë. Madje kreu i Gjykatës Kushtetuese Bashkim Dedja është zgjedhur fiks me 70 vota. Aq sa nuk mjaftojnë për të kaluar as edhe një projektligj që kërkon gjysmën e deputetëve të parlamentit.
Megjithatë Dedja nuk duhet të “qahet”, pasi vetë kreu aktual i shtetit është zgjedhur me 72 vota. Pra me 22 vota më pak sesa parasheh oferta e Ramës për paketën e re kushtetuese, të cilën Basha nuk e pranon.
Javanews.al
