Ditën e sotme, partitë politike dorëzojnë në KQZ listat me 186 kandidatë për deputetë për zgjedhjet parlamentare të 11 majit. 46 emra për listën e mbyllur dhe 140 për listën e hapur. Lidhur me këto zhvillime, Flogert Muça, i ftuar në emisionin Dekalog nga Roland Qafoku në DritareTv, ka komentuar listat e Partisë Demokratike dhe ka shprehur disa kritika ndaj tyre.
Muça u shpreh se ka parë një frikë të madhe për të futur disa emra në listen e hapur dhe kjo tregon se ata duan të jenë të sigurt.
“Ata duhet të ishin në fushëbetejë, jo në atë listë. Me këtë veprim, Berisha dhe PD tregojnë se kanë frikë,” tha ai.
Përsa i përket emrit të koalicionit, Muça e cilësoi atë si “një emër delirant” dhe shtoi se disa grupe besojnë se do të bëhen si Amerika, dhe duan të gënjejnë popullin.
Sa i përket Jorida Tabakut, Muça e kritikoi duke thënë se ajo ka shfrytëzuar emrin e babait dhe familjes së saj për votat ndërsa pritej më shumë prej saj.
“Jam i zhgënjyer nga këta emra, për mua këta nuk kanë objektiva më të mëdhenj,” tha Muça, duke theksuar se ata duhet të luftonin më shumë për vendet e tyre në listë, në vend që të struken pas listës së sigurt.
Muça përfundoi se ky veprim i PD-së nuk është i drejtë dhe se duhen individë që të dalin dhe të luftojnë për vendin e tyre.
“ Këta struken te lista e sigurt që u mundëson sistemi dhe kjo nuk është e drejtë. Duhet të dalin të luftojnë.”- tha Muça.
