Partia Demokratike pritet të zyrtarojë sot në mbrëmje listën e kandidatëve për deputetë për zgjedhjet parlamentare të 25 qershorit.
Në selinë blu qysh prej paradites së djeshme janë intesifikuar takimet e kryetarit, Lulzim Basha jo vetëm me partitë aleate por edhe me disa prej kandidatëve të propozuar nga baza por që lidershipi i partisë i sheh me skepticizëm për t’i përfshirë në lista.
Nën ethet e prag-hartimit të listave duket se janë përfshirë edhe deputetë apo ish-deputetë demokratë të njohur në të kaluarën si bashkëpunëtorë të afërt të ish-kryeministrit, Sali Berisha por që për shkak të qëndrimeve të tyre kritike ndaj Bashës mendohet se mund të lihen jashtë kandidimit ose të renditen në pozicione ku fitorja e mandatit do të ishte e vështirë.
“BalkanWeb” raporton se sot rreth mesditës ish-ministri i Financave, Ridvan Bode, deputeti Astrit Patozi si edhe ish-ligjvënësi demokrat i Qarkut të Vlorës, Ardian Kollozi, të njohur për qëndrimet e tyre kritike, kanë patur një takim kokë më kokë ku temë kryesore e bisedës ka qenë pikërisht lista e hartuar nga Basha.
Burimet rezervohen të japin detaje nga ky takim apo edhe të konfirmojnë faktin nëse të tre këto figura të PD-së të jenë përfshirë ose jo në listën e deputetëve.
Por saktësohet se fill pas këtij takimi mes tyre, Basha i ka thirrur ata në selinë blu, në bashkëbisedime të veçanta ku ende nuk dihet se çfarë është vendosur për karrierën politike të secili. /b.d
