Ministrat serbë në Qeverinë e Isa Mustafës, Lubomir Mariç (Ministria e Administrimit të Pushtetit Lokal), Dalibor Jevtiç (Ministria për Kthim dhe Komunitete), Branimir Stojanoviç (zëvendëskryeministër i Kosovës) mund të dalin nga Qeveria për shkak të miratimit të Ligjit për “Trepçën”.
Dy ministrat serbë dhe zëvendëskryeministri Stojanoviç, si dhe deputetë serbë në Kuvendin e Kosovës kanë marrë pjesë në konferencën në Beograd, të cilën e ka organizuar Marko Gjuriç, drejtor i Zyrës për Kosovën në Qeverinë e Serbisë, të shtunën, shkruan sot gazeta “Zëri”.
Derisa Gjuriç tha se Serbia të hënën do të kërkojë mbledhje urgjente të Këshillit të Sigurimit të OKB-së, siç tha ai “për rrëmbimin e pasurisë serbe dhe për shkeljen e Rezolutës 1244 të OKB-së, mbi të cilën ndërtohet paqja dhe stabiliteti në rajon”, ministri i Administrimit të Pushteti Lokal në Qeverinë e Kosovës, Mariç, ka bërë të ditur se janë duke u bërë konsultime përbrenda Listës “Srpska” lidhur me vazhdimin apo jo të veprimit të përfaqësuesve serbë në Qeverinë e Kosovës.
“Është fakt se nga marrëveshja e koalicionit asgjë nuk është plotësuar, përveç të disa zgjidhjeve të kuadrove. Ky është problem i madh”, ka thënë Mariç në konferencën e organizuar në Beograd nga Gjuriç, i cili ka ripërsëritur se Ligji për “Trepçën” nuk ka asnjë vlerë për Beogradin. (b.an)
