Me përfundimin të premten të procesit të aplikimit për 27 anëtarët e tre organeve të reja që do të bëjnë Vettingun e gjyqtarëve dhe prokurorëve shqiptarë, Avokati i Popullit, brenda 7 ditesh, pas konsultimeve me Operacionin Ndërkombëtar të Monitorimit (ONM) do te përpiloje një listë me kandidatët që plotësojnë ose jo kriteret formale për secilin pozicion.
Sipas nenit 7, pika 5 te ligjit te Vettingut, ONM, e monitoron ketë proces, duke pasur akses të plotë në dokumentacionin e të gjithë aplikantëve.
Avokati i Popullit menjëherë ia përcjell ONM-së listat e përpiluara dhe të gjitha dosjet individuale të kandidatëve, si dhe publikon listën e plotë të kandidatëve në faqen zyrtare të internetit, të grupuar sipas secilit pozicion.
Një komision i përbërë nga të paktën tre përfaqësues të ONM-së vlerëson kandidatët dhe jo më vonë se 14 ditë nga paraqitja e dy listave nga Avokati i Popullit (AP), ky komision, bazuar në vlerësimet e arsyetuara, lidhur me kualifikimin dhe përzgjedhjen e kandidatëve, i dërgon rekomandimet AP-se, i cili ia përcjell ato Kuvendit.
Në këtë fazë do të jenë të angazhuar tre gjyqtarë e prokurorë nga vendet e Bashkimit Europian dhe një nga Departamenti i Drejtësisë i Shteteve të Bashkuara.
Në përfundim te afatit te aplikimeve për postet e organeve te Vettingut rezultojne 191 persona që kanë shprehur interes për të qenë pjesë e këtyre strukturave, që do të bëjnë rivlerësimin e rreth 800 gjyqtarëve dhe prokurorëve në Shqiperi.
Mes aplikantëve ka pasur dhe mjaft juriste që jetojnë dhe ushtrojnë aktivitetin e tyre jashtë Shqipërisë raporton ATA. Numri i të interesuarve shënoi një rritje të ndjeshme ditët e fundit, pasi fundjavën e shkuar ambasada e SHBA-se në Tiranë si dhe Delegacioni i BE-se, bënë thirrje publike për profesionistët shqiptarë që të aplikonin, për institucionet që do të kenë përgjegjësinë për të kryer procesin ndoshta më të rëndësishëm të të gjithë Reformës në Drejtësi. /a.m.
