Beteja e nisur mes Sali Berishës dhe Lulzim Bashës tashmë është kthyer në një ‘matje muskujsh’ se cili prej tyre gëzon mbështetjen më të madhe të demokratëve.
E ndërsa dy raundet e kësaj beteje, pritet të jenë 11 dhe 18 dhjetori, dy data të caktuara prej Berishës dhe Bashës për të mbledhur Kuvendin Kombëtar, kalkulimet kanë nisur të bëhen.
I pari që foli me gjuhën e shifrave ishte Sali Berisha i cili deklaroi se kishte 4200 firma delegatësh, nga rreth 7650 anëtarë të Kuvendit Kombëtar, që përbëjnë më shumë se gjysmën e firmave të nevojshme për ta mbledhur institucionin më të lartë të partisë, por edhe kuorumin e nevojshëm për vendimmarrje.
Po me shifra, PD zyrtare iu përgjigj një javë më parë, kur pas një mbledhje kryesie, 26 nga 38 anëtarë u rreshtuan në krah të Bashës për të mbledhur Kuvendin në datën 18 dhjetor.
Fitorja e dytë me shifra, u deklarua dy ditë më pas nga lidershipi blu kur mbodhi në seli krerët e degëve. Nga 71 krerë degësh, sipas zërave zyrtarë të partisë, vetëm 5 prej tyre i dolën në krah Berishës.
E teksa datat e Kuvendeve po afrojnë, beteja e radhës është se kush gëzon shumicën në grupin parlamentar. Në më shumë se 20 takime të ‘foltores’, 11 deputetë kanë marrë pjesë, ndërsa me deklarata publike në mbështetje të vendimeve të Lulzim Bashës janë të paktën 20 deputetë.
Rasti më i fundit ishte ai i deputetes së Krujës Merita Bakiu, e cila iu bashkua një takimi me ish-kryeministrin Berisha. Pas publikimit të fotove nga ky i fundit në rrjetet sociale, Bakiu sqaroi se do të pranojë takime me çdo demokrat, por qëndrimi i saj është pro mbajtjes së kuvendit kombëtar të PD në datën 18 dhjetor.
Të mbetur mes deklaratash në mbledhjet e partisë, tek tuk në media në mbrojtje të vendimit të Bashës në emër të marrëdhënies me SHBA, apo në heshtje të plotë, deputetët si Emilja Koliqi, Lindita Metaliaj, Zheni Gjergji, Fatjon Veizaj, Elda Hoti, apo Xhelal Mziu që braktisi foltoren e Berishës duket se do të përcaktojnë se në cilën anë do të anojë peshorja e grupit parlamentar të PD.
Në radhët e deputetëve të PD, ka patur edhe zëra asnjëanës si deputeti Tomorr Alizoti.
Përtej shifrave, ajo që nxorri në pah beteja Berisha-Basha ishin edhe një sërë akuzash e sulmesh personale mes njëri tjetrit. E teksa në sytë e Berishës Lulzim Basha është një lider i thyer e njeri i pabesë që nuk e sjell partinë në pushtet, edhe në retorikën e tij kreu i PD nuk i ka kursyer sulmet, duke thënë se Berisha po përdor demokratët për interesa personale.
DEPUTETËT PRO BASHËS:
Agron Gjekmarkaj
Alfred Rushaj
Arbi Agalliu
Dashnor Sula
Dhurata Çupi
Enkelejd Alibeaj
Eralda Tase
Ervin Salianji
Ferdinand Xhaferraj
Flamur Hoxha
Flutura Açka
Gazment Bardhi
Grida Duma
Helidon Bushati
Ina Zhupa
Kreshnik Çollaku
Lefter Gështenja
Merita Bakiu
Orjola Pampuri
Sajmir Korreshi
DEPUTETËT PRO BERISHËS:
Albana Vokshi
Belind Këlliçi
Bujar Leskaj
Edi Paloka
Edmond Spaho
Flamur Noka
Isuf Celaj
Luan Baçi
Luçano Boçi
Oerd Bylykbashi
Tritan Shehu
NUK JANË SHPREHUR OSE JANË ASNJËANËS:
Agron Sehaj
Andia Ulliri
Bledion Nallbani
Emilja Koliqi
Fatjon Veizaj
Greta Bardeli
Ilda Dhori
Kasëm Mahmutaj
Kastriot Piroli
Lindita Metaliaj
Elda Hoti
Ramadan Likaj
Seladin Jakupllari
Sorina Koti
Tomorr Alizoti
Xhelal Mziu
Zef Hila
Zheni Gjergji /shqiptarja.com
/b.h
