Ish-komandanti i Zonës Operative të Llapit, Rustem Mustafa, është liruar nga burgu. Mustafa ka dalë prej Burgut të hapur të Smrekonicës pak muaj pas shkuarjes në vuajtje të dënimit.
Gjatë kësaj kohe, ai ishte shfrytëzues i vikendeve si rezultat i sjelljeve të mira dhe risocializimit. Paneli për lirim me kusht ka vlerësuar se Mustafa është i gatshëm t’i kthehet shoqërisë, duke mos paraqitur rrezik për të.
Rustem Mustrafa është në liri. Këtë liri ia ka mundësuar Paneli për lirim me kusht. Ai ka lënë Burgun e hapur të Smrekonicës më 14 korrik të këtij viti.
Ish-komandanti i Zonës Operative të Llapit ka vuajtur tri vjet e tre muaj, e 11 ditë burgim të dënimit prej katër vjetësh për krime lufte kundër popullatës civile të kryera gjatë luftës në një të ashtuquajtur burg të UÇK-së.
I kanë mbetur edhe tetë muaj e 18 ditë të cilat do t’i shlyejë në liri. Në aktvendimin e Panelit për lirim me kusht të përbërë prej Emine Kqikut – kryesuese, Sevdije Morinës dhe Muhamet Berishës – anëtarë jepet arsyetimi se pse është aprovuar kërkesa e Mustafës për lirim me kusht.
“Aprovohet kërkesa për lirimin me kusht për të dënuarin Rrustem Mustafa…, (1971), lindur në Shajkovc të Podujevës. Rrustem Mustafa do të lirohet me 14 korrik 2016 dhe do të jetë nën mbikëqyrjen e Shërbimit Sprovues të Kosovës deri me datën 1 prill 2017”, thuhet në aktvendim.
Aty sqarohet se parashtruesi i kërkesës, i dënuari Rrustem Mustafa me kërkesën e tij të pranuar më 5 prill 2016 i është drejtuar Panelit, me të cilën kërkon lirimin me kusht, për pjesën e mbetur të dënimit. (b.an)