Lirimi i Lulzim Berishës, Gjykata e Lartë pranon rekursin, pritet shqyrtimi gjyqësor

Lirimi i Lulzim Berishës me kusht 1 vit më parë shkaktoi një zhurmë të madhe jo vetëm mediatike, por edhe politike. Opozita akuzoi mazhorancën dhe kryeministrin Rama se liruan kreun e bandës së Durrësit para kohe. Lirimi i tij solli edhe reagimin e ambasadorit amerikan Donald Lu.
Lidhur me këtë çështje, prokuroria kishte bërë rekurs në Gjykatën e Lartë ku dosja kishte mbetur prej 1 viti në Dhomën e Këshillimit.
Tashmë u vendos kalimi i çështjes në seancë dhe pritet të bëhet shqyrtim gjyqësor. Dhoma e këshillimit, është filtri i parë që çdo çështje duhet të kalojë në gjykatën supreme.
Tashmë, kolegji penal me relator Artan Zenelin, pritet të caktojë datën për zhvillimin e procesit, e në fund do të jepet një vendim nëse lirimi i tij ishte i drejtë dhe në përputhje me ligjin./a.m.