Pas letrës publike të ambasadës franceze në Tiranë, drejtuar krerëve të institucioneve të drejtësisë, ku shprehej shqetësimi për lirimin nga burgu të Domart Konjarit, i njohur ndryshe edhe si një nga pjesëtarët e ish-bandës së “Rrugës Bardhyl” në Tiranë, ka reaguar Ministri i Drejtësisë, Ylli Manjani. Ai ka shprehur ndjesë publike për vendimin e Gjykatës së Krimeve të Rënda të Apelit, që sipas tij, ka vënë në diskutim vlefshmërinë, juridiksionin apo legjitimitetin e gjykatave franceze.
“Kërkoj një ndjesë publike pavarësisht që nuk më takon mua në kuptimin ligjor, por sidoqoftë ndjesën duhet të tregojmë si shtet, si komb si shoqëri, të cilën kemi ende luksin të diskutojmë vlefshmërinë, juridiksionin apo legjitimitetin e gjykatave franceze, të cilat janë gjykata në kuptimin e besueshmërisë dhe funksionimit, gjykata me super standard. Do të bëjmë gjithçka që kemi në dorë“, shprehet Manjani.
Megjithatë Ministri i Drejtësisë i ka mundësitë ligjore të kufizuara për të ndërhyrë në vendimin e Gjykatës, Manjani paralajmëron nisjen e inspektimit ndaj Gjykatës së Krimeve të Rënda të Apelit, që çuan në lirimin e 42 vjeçarit të dënuar me 10 vite burg nga drejtësia franceze.
“Kam biseduar me Ministrin e Brendshëm, me autoritetet e Policisë së Shtetit, me Prokurorin e Përgjithshëm, për të gjetur të gjithë zgjidhjen e nevojshme që të vendoset në vend ajo gafë që unë besoj se ka ndodhur në kuptimin substancial në Gjykatën e Krimeve të Rënda të Apelit. Sigurisht që Ministri i Drejtësisë i ka mundësitë ligjore të kufizuara, sepse procedimi disiplinor që mund të nisi lidhet vetëm më çështje procedurale. Pra Ministri mund të mos jetë dakord me thelbin e vendimit por nuk është autoriteti që e ndryshon. Patjetër që po kjo është detyra ime të inspektojë për çdo gjë. E kam thënë dhe kam vullnet të fort që të inspektoj çdo çështje e cila shfaqet si shqetësim në opinionin publik, ashtu siç shfaqet edhe si shqetësim i bashkëpunimit në qeveritë partnere. Ministri i Drejtësisë është autoritet ligjor ekskluziv që rregullon marrëdhëniet juridiksionale, merret me këtë marrëdhënie me qeveritë e vendeve të tjera“, tha Manjani. Shqiptarja.com
