“Disa gjyqtarë dhe prokurorë kanë shfrytëzuar situatën tranzitore të Reformës në Drejtësi, duke liruar të dënuar në shkelje të rëndë të Kodit Penal”, deklaroi dje  në mbrëmje ministrja e Drejtësisë, Etilda Gjonaj.

Në një lidhje direkte me studion e emisionit “Java në RTSH”, Gjonaj iu referua rastit të lirimit nga burgu të të dënuarit me burgim të përjetshëm Endrit Dokle.

“Ky rast po raste të ngjashme të lirimeve nga gjykatat duhen parandaluar. Disa gjyqtarë dhe prokurorë kanë shfrytëzuar situatën tranzitore të reformës. Elementë të tillë në sistemin e drejtësisë cenojnë besimin e publikut”, tha ajo.

Ajo tha se ka kërkuar nga KPK që këtë gjyqtare apo të tjerë që kryejnë shkelje me veprimet apo mosveprimet e tyre t’i kalojnë me prioritet në skanimin e procesit të Vetingut.

“Kodi Penal i parashikon qartësisht kriteret për përfitimin e lirimit me kusht të të dënuarve me burgim të përjetshëm. Ministria e Drejtësisë ka kryer një hetim të plotë të dokumentacionit. Edhe në vitin 2018 ka pasur të njëjtin trajtim ligjor mënyra se si gjyqtarja e ka përdorur Kodin Penal dhe e ka interpretuar dhe kjo në konsideratat tona është në shkelje të rëndë të Kodit Penal”, tha Gjonaj në studion e emisionit “Java në RTSH”.

Ministrja theksoi se “qeveria ka propozuar disa ndryshime për ligjin për statusin e gjyqtarëve dhe prokurorëve me qëllim ndëshkimin e këtyre gjyqtarëve dhe prokurorëve”.

Gjonaj u pyet nga analisti Lorenc Vangjeli për ekzistencën e një dosje me shkresa, që ajo ua ka përcjellë disa institucioneve dhe që redaksia e emisionit “Java në RTSH” e disponon ekskluzivisht.

Lorenc Vangjeli: Redaksia e emisionit tonë ka ne dispozicion një dosje e cila ka disa shkresa që I drejtohen KPK-së, ONM-së, Këshillit të Lartë Gjyqësor dhe Kryeprokurorit Olsian Ccela. Keni marrë përgjigje për këtë korrespondencë me këto institucione?

Etilda Gjonaj: Unë nuk e di mënyrën se pse I keni ju këto shkresa, sepse janë institucionale..

Vangjeli: Ky është profesioni jonë si gazetarë. JU a keni marrë përgjigje?

Gjonaj: Unë kam kërkuar pikërisht ato masa që janë ëbrë publike. Ende nuk kemi marrë përgjigje. Megjithatë u kemi lënë kohë që të marrin masa për të reaguar.