Katër gratë izraelite që u liruan sot, pas 15 muajsh robëri në Rripin e Gazës, janë “në gjendje të qëndrueshme”, njoftoi spitali në të cilin u dërguan, pranë Tel Avivit, pasi ato iu nënshtruan analizave të para mjekësore.
“Jam e lumtur t’ju them se gjendja e tyre është e qëndrueshme,” u tha gazetarëve Dr. Lena Coren Feldman, drejtoresha e asociuar e Qendrës Mjekësore Rabin.
“Siç pritej, mbajtja e tyre e gjatë në kushte të vështira është evidente ”, shtoi doktoresha.
Kryeministri izraelit Benjamin Netanyahu përshëndeti kthimin e katër grave, të cilat ishin rrëmbyer nga Hamasi më 7 tetor 2023.
“Është një moment shumë i lumtur , të cilin e kemi pritur për një kohë të gjatë,” tha Netanyahu në një telefonatë me prindërve të njërës prej katër grave ushtarake izraelite të liruara.
Në të njëjtën kohë, Shtëpia e Bardhë njoftoi se SHBA do të vazhdojë përpjekjet në bashkëpunim me Izraelin, “për të çliruar të gjithë pengjet” që mbahen ende në Gaza.
Duke përshëndetur lirimin e katër grave, qeveria amerikane shtoi se qëllimi i saj është “paqja në të gjithë rajonin”.
Grupi i militantëve palestineze Hamas liroi sot katër gra ushtare izraelite që mbante peng prej tetorit të vitit 2023, në këmbim të 200 të burgosurve palestinezë, kjo në përputhje me marrëveshjen që i dha fund luftimeve rreth 15 mujore në Gazë.
Katër pengjet izraelite u transportuar me automjete të Kryqit të Kuq tek forcat izraelite.
Menjëherë pas kësaj, autobusë me të burgosur palestinezë u panë duke u nisur nga burgu ushtarak izraelit ‘Ofer’ që ndodhet në Bregun e pushtuar Perëndimor. Shërbimi i Burgjeve të Izraelit tha se ishin liruar 200 persona.
Këto zhvillime u përshëndetën nga izraelitë të mbledhur në Tel Aviv e palestinezë të mbledhur në Ramallah. Ky është shkëmbimi i dytë sipas marrëveshjes së armëpushimin, pas të parit që ndodhi më 19 janar.
Marrëveshja parashikon që Hamasi të lirojë 33 gra, fëmijë, të moshuar, të sëmurë apo pengje të plagosur, gjatë një faze të parë gjashtëjavore, ndërsa Izraeli do të lirojë në këmbim, 30 të burgosur për çdo civil të liruar dhe 50 për çdo ushtar.
Katër ushtaret izraelite të liruara të shtunën – Karina Ariev, Daniella Gilboa, Naama Levy dhe Liri Albag – u morën peng më 7 tetor të vitit 2023 ndërsa ndodheshin në një postë ushtarake vëzhgimi pranë Gazës. Sulmi terrorist i grupit të militantëve të Hamasit brenda territorit izraelit u bë shkak për fillimin e luftës në Gazë.
