Liridon Latifi dhe klubi i Skënderbeut befasuan me zgjedhjen e bërë për vijimin e karrierës së mesfushorit të Kombëtares shqiptare, i cili ishte nën kontratë me korçarët. Nga e premtja, Latifi është zyrtarisht futbollist i Akademisë Pushkash në elitën e futbollit hungarez.
Klubi i themeluar 10 vite më parë dhe që mban emrin e legjendës së futbollit të Hungarisë, njoftoi se Latifi firmosi kontratë 4-vjeçare, ndërsa në arkat e klubit korçar, do të shkojnë rreth 1 milionë euro.
Paga e Latifit pritet të jetë afro 30 mijë euro në muaj, një shifër mjaft e lartë për një klub që ende nuk ka fituar asgjë në elitën e futbollit hungarez.
Megjithatë, përveç parave, klubin korçar dhe vetë futbollistin, e joshi plani që kanë drejtuesit e Akademisë Pushkash.
Këta të fundit synojnë që për një periudhë të shkurtër të fitojnë titullin në Hungari dhe klubi të ketë suksese të mëdha në Europë. Pas shtatë javëve kampionat, Pushkash pozicionohet në vendin e shtatë.
