Një tabelë e madhe me mesazhin “Lake Ontario. Now and Always” – “Liqeni Ontario. Tani dhe përgjithmonë” është vendosur në bregun kanadez të Liqenit Ontario, në një përgjigje të drejtpërdrejtë ndaj vendimit të Presidentit amerikan Donald Trump për ta riemërtuar atë “Lake America”.
Kryeministri i Ontarios, Doug Ford, qëndroi përpara tabelës së sapovendosur dhe deklaroi se emri i liqenit nuk do të ndryshojë në Kanada.
“Shumë kohë përpara Presidentit Trump, ky liqen quhej Liqeni Ontario. Shumë kohë pasi Presidenti Trump të jetë larguar, ai do të vazhdojë të quhet Liqeni Ontario”, tha Ford.
Ai shtoi se tabela është vendosur “vetëm në rast se Presidenti Trump apo dikush tjetër e harron”, duke theksuar: Është Liqeni Ontario, tani dhe përgjithmonë.
Vendosja e tabelës vjen pasi Trump nënshkroi një urdhër ekzekutiv për ndryshimin e emrit të liqenit në SHBA. Megjithatë, Kanadaja nuk është e detyruar ta njohë këtë ndryshim.
Edhe Google ka konfirmuar se do të përdorë emërtime të ndryshme sipas vendit: përdoruesit në SHBA do të shohin “Lake America”, ata në Kanada “Lake Ontario”, ndërsa përdoruesit në vende të tjera do të shohin të dy emrat.
Përplasja për emrin e liqenit vjen në një periudhë tensionesh të forta mes Uashingtonit dhe Otavës, pas mosmarrëveshjeve tregtare dhe vendosjes së tarifave të reja amerikane ndaj mallrave kanadeze.
Liqeni Ontario është më i vogli nga pesë Liqenet e Mëdha dhe shtrihet përgjatë kufirit mes provincës kanadeze të Ontarios dhe shtetit amerikan të Nju Jorkut.
