Pasioni për lojërat e fatit ka çuar drejt fundit tragjik një çift të moshuarish në Itali. Giuseppe Gallina, një pensionist 70-vjeçar, ka vrarë gruan e tij, Fiorella Radaelli, 66 vjeçe, ndërsa më pas ka tentuar të vetëvaret në ballkonin e vilës ku jetonte, në Monza. Por litari është këputur dhe burri ka rënë nga lartësia, duke përfunduar i vdekur në oborr.
Trupat e pajetë janë zbuluar nga motra e njërit prej viktimave, e cila ka shkuar për një vizitë krejt rastësisht.
Policia nuk ka ende një version zyrtar për motivet e vrasjes dhe vetëvrasjes raporton Shekulli. Por gruaja njihej për pasionin e saj për pokerin. Një zënkë që ka pasur shkak problemet ekonomike të shkaktuara nga lojërat e fatit mendohet se ka degjeneruar në përdorimin e thikës nga burri, i cili më pas, në kushtet e tronditjes së fortë psikologjike, ka vendosur t’i japë fund edhe jetës së vet.
