Prej pak ditësh, mijëra banorë të zonës së Qytetit Studenti dhe rrugës “Jordan Misja” në Tiranë përfitojnë një shërbim të ri transporti publik.
Kështu njofton Bashkia e Tiranës sipas së cilës kjo linjë plotëson një kërkesë të hershme të qytetarëve, ku falë ndërhyrjes linja ekzistuese “Qyteti Studenti – Qendër” ka pësuar zgjatim deri në rrugën “Jordan Misja”, në afërsi të shinave të trenit.
Shërbimi në linjën e re u inspektua nga kryetari i Bashkisë së Tiranës, Erion Veliaj, i cili tha se ky është një premtim i mbajtur dhe zgjatja e linjës së re u shërben mjaft prej zonave, të cilat janë mbipopulluar vitet e fundit.
“Morëm uratën e të gjithë atyre që, deri para pak javësh, këtë rrugë e bënin në këmbë, ndërsa sot u njihet abonoja. Sot ka një sistem GPS dhe sot shpeshtësia çdo 5-6 minuta e autobusëve ka bërë që dy ekstreme të Tiranës, nga Depo e Ujit deri te rruga “Jordan Misja” të lidhen në mënyrë perfekte, duke u kryqëzuar pastaj me autobusët e tjerë rreth qendrës, të cilët gjithashtu njohin abonetë. Për shumë prej qytetarëve është shkurtuar distanca, është shkurtuar koha dhe sigurisht, janë shkurtuar shpenzimet që më përpara ishin të panumërta, me kakofoninë e linjave që kishte Tirana dhe me mosarritjen e linjave deri në këto ekstreme”, theksoi Veliaj.
Linja do të jetë pjesë e sistemeve GPS që po instalohen dhe do mundësojnë sistemin e monitorimit dhe kontrollit në kohë reale, si dhe një sistem raportim/pikëzimi që lidhet me performancën e shërbimit./b.d
