Linja e autobusit e shoqërisë “Tirana Urban Trans” ka shtuar me dy stacion të pa miratuar itinerarin e saj drejt rrethrrotullimit të Farkës, dhe për këtë itinerar kërkon nga qytetarët në mënyrë abuzive para shtesë. Qytetarët që përdorin këta autobusë çdo ditë thonë se paguajnë dy herë për të njëjtin rrugëtim që ndjekin, pasi abonenë që blejnë nuk e njohin punonjësit e kësaj linje.
“Jo aboneja nuk njihet. Deri në Sauk njihet, Sauk e këtej nuk njihet. Deri këtu me abone pjesa tjetër me lekë.”-shprehen qytetarët.
Fatorinot pranojnë se kjo ka ekzistuar si praktikë, por pas shkurtit thonë se abonetë do tu njihen qytetarëve deri në destinacionin përfundimtar të udhëtimit.
“Më para deri në Sauk njihej abonoja, tani njihet deri në fund.” – thotë fatorinoja.
Agjencia për Mbrojtjen e Konsumatorit pranë Bashkisë së Tiranës ka gjobitur këtë linjë vetëm për muajin janar me 20 gjoba që kapin vlerën e 200 mijë lekëve të rinj për ndërrimin e destinacionit.
Ndërsa gjoba të tilla ka marrë edhe nga administrate e mëparshme. Sakaq Bashkia e Tiranës e pyetur për rastin deklaron se aboneja duhet të njihet deri në fund të destinacionit dhe fton qytetarët për denoncime të rasteve të tilla. Por bën me dije se kjo linjë është lejuar të funksionojë jashtë itinerarit që nga administrate e mëparshme.
