Kryetari i Nismës, Fatmir Limaj, në një shkrim dërguar mediave ka reaguar pas zhvillimeve të fundit, duke thënë se shteti i Kosovës s’ka qenë asnjëherë më keq.
Limaj vlerëson se zhvillimet e fundit në vendin tonë tregojnë se gjendja e vendit që nga pas lufta nuk ka qenë asnjëherë më e keqe se tani. “Shteti ynë po rrënohet për çdo ditë para syve tanë”, tha Limaj.
Qeveritë e deritanishme, sipas Limajt, kanë rrënuar institucionet e pavarura dhe e kanë futur vendin në një krizë mjaft të thellë.
Ai vazhdon më tutje duke thënë se legalizimi i Asociacionit të komunave me shumicë serbe, ka rrënuar rendin kushtetues dhe juridik të vendit. “Me legalizimin e Bashkësisë së komunave serbe legalizuan entitet të ri politiko-juridik dhe territorial brenda Kosovës, përmes së cilës rrënuan rendin kushtetues-juridik dhe me këtë përfundimisht e ndanë Kosovën në baza etnike. Përmenda vetëm disa nga të këqijat që ky koalicion qeverisës i solli Kosovës brenda një periudhe të shkurtër kohore”, ka thënë Limaj.
Në këtë shkrim, Limaj thotë se duke qenë para një situate të tillë, beson se është momenti i fundit që të gjithë, të cilët e shohin njëlloj këtë gjendje dhe janë të shqetësuar për të ardhmen e Kosovës duhet të bashkohen.
“Ndalja e rrënimit të mëtejshëm të shtetit tonë është e mundshme vetëm përmes një fronti të përbashkët opozitar”, ka thënë Limaj. Sipas tij, vetëm një front opozitar mund të ndryshojë këtë gjendje në vend.
“Me këtë front opozitar nënkuptoj jo vetëm partitë opozitare por edhe shoqërinë civile, intelektualë, studentë, punëtorë, të papunë dhe të gjithë ata që dëshirojnë të angazhohen për të ndalur rrënimin e shtetit para syve tanë. Ne mund edhe të kemi këndvështrime të ndryshme, por kjo nuk duhet të jetë pengesë për angazhim të përbashkët në funksion të ndaljes së rrënimit të shtetit, kthimin e shpresës tek qytetarët dhe fillimin e ndryshimit të gjendjes”, ka përfunduar Limaj.
