Gjykata për Krime të Rënda ka lënë në burg ish-boksierin e Vllaznisë, Nelson Hysa i cili u arrestua dy ditë më parë si pjesë e grupit “Bajri”.
Hysa u arrestua mëngjesin e të shtunës, pasi ishte shpallur në kërkim si pjesë e grupit të “Bajrit” në shtator të 2018.
Ndaj tij, rëndojnë akuzat “Paracaktim i rezultateve më garat sportive”, “Pjesëmarrje në grup kriminal” dhe “Organizatë kriminale”.
Ai u kap në një banesë të marrë me qera në zonën e Komunës së Parisit Tiranë, gjatë operacionit të zhvilluar mëngjesin e sotëm nga Njësia Hetimore Qendrore në bashkëpunim me Drejtorinë e Forcës Posaçme Operacionale, në Departamentin e Policisë Kriminale dhe Prokurorinë e Krimeve të Rënda. Njësia Hetimore Qendrore për të lokalizuar vendndodhjen e personit të shpallur në kërkim ka bashkëpunuar me Drejtorinë Vendore të Policisë Tiranë dhe Shkodër.
Gjatë veprimeve proceduriale u sekuestrua nje automjet “BMW Seria 3”. Materialet proceduriale shtesë iu referuan Prokurorisë Pranë Gjykatës së Shkallës së Parë për Krimet e Rënda Tiranë.
Në maj 2017 Nelson Hysa i shpëtoi një atentati në Shkodër ku mbeti edhe i plagosur.
