Ministri në këtë proces mundet vetëm të paraqesë ankesë tek ky organ kur ka të dhëna të besueshme që një gjyqtar ka kryer veprime që përbëjnë shkelje disiplinore. Ministri nuk do të kontrollojë më Prokurorinë dhe të raportojë për shkeljet tek presidenti dhe Kuvendi dhe nuk do të drejtojë më mbledhjen e statistikave për drejtësinë. Kontrolli mbi e prokurorisë do të ushtrohet nga Këshilli i Lartë i Prokurorisë dhe Inspektori i Lartë i Drejtësisë, në rastet e shkeljeve disiplinore.
Sipas draftit të zbardhur nga Report Tv Ministri i Drejtësisë mund të marrë pjesë si vëzhgues në Mbledhjen e Përgjithshme të prokurorëve, të Këshillit të Përgjithshëm të Dhomës Kombëtare të Avokatisë, të Asamblesë së Personelit Akademik dhe të Këshillit Drejtues të Shkollës së Magjistraturës, mbledhjes së posaçme të drejtuesve të institucioneve për zgjedhjen e anëtarëve prokurorë të Këshillit të Lartë të Prokurorisë, si dhe në mbledhjen e përbashkët të Këshillit të Lartë Gjyqësor dhe Këshillit të Lartë të Prokurorisë.
Ligji i ri i heq dhe një tjetër kompetencë të rëndësishme, siç është ajo e kontrollit të administratës gjyqësore. Ai do ta ushtrojë këtë kontroll vetëm në rastet administrimit të pasurive të patundshme. Me hyrjen në fuqi të ligjit për ngritjen e institucioneve të reja të drejtësisë, që aktualisht është në Gjykatë Kushtetuese i ankimuar nga PD, ministri i drejtësisë ka 3 muaj afat për të mbyllur të gjitha hetimet disiplinore të papërfunduara brenda para se kompetencat t’i kalojnë këtyre intitucioneve.
