Drejtoria e Apelimit, e cila deri tani është në varësi të Administratës Tatimore, do të zhvendoset si një strukturë e pavarur pranë ministrisë së Financave.
Në bazë të këtyre ndryshimeve proceduriale për detyrimet deri në 1 milion lekë do të vendosi Drejtoria e Apelit, për detyrimet mbi 1milion lekë do të ketë një bord, i cili do të definohet me vendim të Këshillit të Ministrave, me pjesëmarrjen e shoqatës së bankave, të audituesve ligjorë, të përfaqësuesve të biznesit, ministrisë së Financave dhe tatimeve. Bordi do të emërohet Bordi i Shqyrtimeve të Apelimeve Tatimore.
Referuar të dhënave nga ministria e Financave, aktualisht mbi 96% e apelimeve rrëzohen në disfavor të biznesit dhe mbi 50% e atyre që shkojnë në Gjykatën e Apelit fitohen nga sipërmarrjet. Ndaj ministria e Financave në ligjin e ri “Për procedurat tatimore” ka vendosur dhe kushtin që nëse Apeli i jep të drejtë sipërmarrjes, administrata tatimore nuk ka më të drejtë të shkojnë në gjykatë. Sipas ligjit, nëse në bordin e shqyrtimit të apelimeve tatimore, vendimi është pro sipërmarrjes, praktikisht administrata tatimore ndërpret procesin e rekursit dhe zbaton vendimin e Apelit.
