Një fluks i lartë i mjeteve dhe udhëtarëve është regjistruar të dielën në të dyja anët e kufirit Shqipëri–Kosovë, për shkak të përfundimit të fundjavës dhe kthimit të qytetarëve drejt vendeve të tyre.
Sipas të dhënave nga Drejtoria e Kufirit dhe Migracionit, gjatë fundjavës, të shtunën dhe të dielën, në Shqipëri kanë hyrë 14 mijë e 307 shtetas të Kosovës, të cilët kanë zgjedhur të kalojnë ditët e pushimit në vendin tonë.
Ndërkohë, në të njëjtën periudhë, 16 mijë e 213 shtetas shqiptarë kanë udhëtuar drejt Kosovës.
Si pasojë e këtij fluksi të lartë, aksi rrugor Morinë–Kukës paraqitet i ngarkuar nga lëvizja e madhe e automjeteve. Referuar të dhënave zyrtare, gjatë kësaj fundjave kanë qarkulluar 6 mijë e 358 mjete me targa të Kosovës dhe 7 mijë e 432 mjete me targa të Shqipërisë.
Në Pikën e Kalimit Kufitar të Morinës, për shkak të marrëveshjes për lehtësimin e procedurave mes dy vendeve, shtetasit e Shqipërisë dhe Kosovës që udhëtojnë me mjete me targa të dy vendeve po kalojnë pa kontrolle, çka ka ndihmuar në shmangien e radhëve dhe përshpejtimin e qarkullimit.
Ndërsa për qytetarët që udhëtojnë me mjete me targa të huaja, autoritetet kufitare në Morinë dhe Vërmicë po zbatojnë procedurë të përshpejtuar, me qëllim përballimin e fluksit dhe lehtësimin e lëvizjes në të dyja anët e kufirit.
