Ndryshimet në ligjin “për organizimin dhe funksionimin e Ministrisë së Drejtësisë” janë shoqëruar me debate të mërkurën në komisionin e Ligjeve.
I pranishëm në komision, ministri i Drejtësisë, Petrit Vasili kërkoi që të rregullohet roli i Inspektorit të Lartë të Drejtësisë, në raport me ministrinë.
Ndryshimet e propozuara, që vijnë në zbatim të reformës në drejtësi, parashikojnë mes të tjerash, që kompetenca për të filluar procedimin disiplinor i njihet Inspektorit të Lartë të Drejtësisë, ndërsa Ministrisë së Drejtësisë në këtë process i lihet si kompetencë vetëm paraqitja e ankesës.
Nisur nga kjo, ministri Vasili tha se ministria e Drejtësisë nuk mund të bëhet postë për të marrë ankesat dhe t’ía përcjellë më pas ato Inspektorit të Lartë.
“Duhet qe Ministria t’i filtrojë më parë, pasi rrezikohet kaos. Kur bëhen ndryshime mos mendoni për emrin e ministrit që është sot, por institucionit në të ardhmen. Nuk kemi kërkuar kontroll të dyfishtë, as në periudhën tranzitore dhe as më pas” u shpreh Vasili.
Ndërsa deputeti socialist Pandeli Majko vërejti se po krijojmë institucione kushtetuese dhe nuk mund ta largojmë ministrinë direkt nga kompetencat e saj. Të lëmë një periudhë të ndërmjetme që do të ndihmojë Inspektorin e Lartë të Drejtësisë, tha ai. Kjo periudhe tranzitore, sipas Majkos, do të shoqërohej me kompetenca të përbashkëta kontrolli nga dy institucionet.
Kryetari i komisionit të Ligjeve, Fatmir Xhafaj tha se ndryshimet në ligj lidhen me reformën në drejtësi. “Sado dëshirë të mirë të kemi, duhet të zbatojmë kornizat kushtetuese”, u shpreh ai. /b.d
