Ditën e sotme në Kuvend është mbledhur Komisioni për Çështjet Ligjore, i cili pritet të miratojë grupin e punës që do të punojë për ligjin organik për Presidentin e Republikës.
Sipas projektvendimit emrat e propozuar për grupin e punës janë: Vasilika Hysi, Adnor Shameti dhe Alban Zeneli.
Pavarësisht faktit që Meta i shpëtoi shkarkimit nga Kuvendi, shumica qeverisëse po harton një ligj që përcakton qartësisht kompetencat presidentit nëpërmjet një ligji organik, duke mos krijuar më konfuzion apo tejkalim kompetencash nga ky institucion.
Ky ligj sqaron në detaje teknikalitetet e veprimtarisë kushtetuese të Presidentit të Republikës. Ligji organik ndër të tjera pritet të konstatojë të drejtat e presidentit për të dekretuar ose refuzuar dekretimin e një ministri, e drejta e presidentit për të ndryshuar datën e zgjedhjeve apo për mos thirrur në betim anëtarët e Gjykatës Kushtetuese, precedentë të cilët kanë sjellë jo pak përplasje mes Kuvendit dhe Presidencës.
/e.rr
