Paraqitje çdo muaj pranë zyrave të punës, raportim i përpjekjeve individuale për të gjetur një punë, mosrefuzim i pjesëmarrjes në programet e nxitjes së punësimit apo mosrefuzim i një vendi të përshtatshëm pune, qoftë edhe një herë të vetme. Këto janë disa nga detyrimet që duhet të përmbushë çdo punëkërkues, i regjistruar në zyrat e punës, në mënyrë që të mos humbasë statusin e të papunit, shkruan Gazeta Shqiptare.
Gjithçka përcaktohet në ligjin “Për punëkërkuesit”, që është botuar ditën e djeshme në Fletoren Zyrtare e që do të hyjë në fuqi pas 15 ditësh. Ndërkaq, përveç rasteve të mësipërme, ligji i ri ka parashikuar edhe një sërë rastesh të tjera, që nëse nuk zbatohen nga punëkërkuesit e regjistruar në zyrat e punës, rrezikojnë statusin. Sipas ligjit, heqja ose refuzimi i statusit të punëkërkuesit kryhet nëse oferta e punës apo programet e tjera të përshtatshme që ofrohen, kundërshtohen, refuzohen apo nuk pranohen, si gjatë intervistimit të parë, ashtu edhe në takimet e radhës, në vijimësi, kur punëkërkuesi: nuk kërkon më punë dhe e deklaron një gjë të tillë; refuzon pjesëmarrjen në formimin profesional falas, i cili vlerësohet se ndihmon integrimin e tij në tregun e punës; ndërmjetësohet në punë; ka gjetur vetë punë apo konstatohet se ka bërë një deklaratë false dhe kjo konsiderohet vepër penale. Kjo do të thotë se, të gjithë ata punëkërkues, të cilët përfitojnë ndihmë ekono-mike apo pagesë papunësie, nuk do të mund ta marrin më, në rast se nuk zbatojnë rregullat e mësipërme. Ndërkaq, “Gazeta Shqiptare” zbardh të plotë një prej neneve më të rëndësishme të ligjit, që ka të bëjë me regjistrimin dhe çregji-strimin e punëkërkuesve të papunë.
Sipas relacionit që shoqëronte ligjin në Kuvend, me hyrjen në fuqi të tij do të bëhet e mundur që të identifikohen personat, që realisht kërkojnë një punë. Ndërkohë që, ministri i Mirëqenies Sociale dhe Rinisë, Blendi Klosi ka deklaruar më herët se ai “do të zhdukë dembelizmin, pasi ata që regjistrohen në zyrat e punës, më së shumti e bëjnë këtë për të përfituar ndihmën ekonomike dhe jo për të gjetur një punë”. Megjithatë, ndryshe nga sa deklaron ministri, vetë shifrat e servirura nga MMSR-ja thonë se vetëm 48% e të regjistruarve përfitojnë nga këto programe, ndërkohë që 52% e tyre nuk kanë asnjë përfitim nga fakti se janë regjistruar në zyrat e punës. Sipas relacionit shoqërues, “në zyrat e punësimit aktualisht janë të regjistruar 152 mijë punëkërkues. Nga këta, 43% janë përfitues të ndihmës ekonomike dhe 5% janë përfitues të pagesës së papunësisë. Interesimi i grupeve të skemave me mbështetje me të ardhura, siç është ndihma ekonomike dhe pagesa e papunësisë, për t’u punësuar, është shumë i ulët”.
BW