Janë të paktën 10 çështjet me të cilat demokratët nuk bien dakort në projektligjin e Vettingut, të hartuar nga ekspertët ndërkombëtarë të OPDAT dhe EURALIUS. Në dokumentin e përpiluar nga ekspertët demokratë të ligjeve, PD kërkon detajimin e disa çështjeve, si psh rolin e operacionit ndërkombëtar të monitorimit (OMN), rolin e inspektoriatit të deklarimit të pasurisë (ILDKPKI) apo të Drejtorisë së Sigurisë së Informacionit të Klasifikuar (DSIK)
Institucionet në fjalë kanë përgjegjësi kryesore për kontrollin e gjyqtarëve e prokurorëve si dhe pasurive të tyre në atë që mund të cilësohet si maja e tehut të reformës në drejtësi.
10 kritikë- propozimet e saj, të përpiluara në 55 faqe material, opozita ja ka dorëzuar ekspertëve. Pikë së pari demokratët kritikojnë mungesën e qartësisë së detajeve, kur fjala vjen për procedurën e përzgjedhjes dhe emërimit të anëtarëve në organet e rivlerësimit, persona këta që do të kryejnë procesin e rëndësisshëm të skanimit të kandidaturave në drejtësi.
Demokratët i rikthehen po ashtu edhe rolit të shumëdebatuar të OMN-së.
“Roli i OMN dhe vëzhguesve ndërkombëtar të jetë në përputhje me nenin B dhe pikën 7 të nenit C të Amendamenteve Kushtetuese, që i koncepton ato si rojtarë që sigurojnë në veçanti transparencë, ndërsa kompetencën vendimmarrëse e lenë në duart e organit të brendshëm”.
Një kritikë tjetër është ajo se mungon qartësia tek procedurat që do të ndiqen, në rast se njëri nga kandidatët për të hyrë në sistemin e drejtësisë përjashtohet. PD thotë se mënyra dhe arsyet e përjashtimit janë të paqarta në draft.
Në lidhje me rolin që Inspektoriati i Deklarimit të Pasurisë do duhet të kryejë, duke mos harruar edhe DSIK-në, PD shprehet:
“ I gjithë procesi i vlerësimit të pasurisë dhe kontrollit të figurës duhet të rikonceptohet, në mënyrë që të japë të gjitha garancitë e nevojshme që do të arrihet rezultati i pritshëm. Masa e jashtëzakonshme e rivlerësimit duhet të zbatohet ekskluzivisht nga organet e posacme të vettingut, pa asnjë rol aktiv të organeve ekzistuese, të kontrolluara apo nën varësinë e Kryeministrit”./java
