Me fillimin e vitit 2016 rritet edhe mosha pensionit për gratë me dy muaj të tjerë. Një grua do të dalë në pension në moshën 60 vjeç e 4 muaj, nga 60 vjeç e dy muaj që ishte një vit më parë.
Ky është një nga efektet që jep skema e re e pensioneve, e cila rrit moshën e daljes në pension për gratë me 2 muaj për çdo vit. Gjithashtu, me rritjen e moshës së daljes në pension do të rriten edhe vitet e punës.Një grua që të marrë pension të plotë duhet të ketë 35 vite 8 muaj punë, nga 35 vite e 4 muaj që duheshin në 2015.
Me skemën e re të përllogaritjes së pensioneve i bie që pensioni minimal në qytet të jetë në vlerën e 14 350 lekë dhe ai maksimal në vlerën e 27 600 lekë.Formula e re parashikon që pensioni do të përllogaritet në bazë të përqindjes së viteve të punës plus pensionin social, raporton Scan.
Kështu një qytetar që del në penision me pagë minimale mesatare 22 mijë lekë për 35 vite kontribute që ka paguar,do të përfitoj një pension në vlerën e 7700 lekë, kësaj i shtohet pensioni social në masën 6650 lekë, në total pensioni minimal del 14 350 lekë. E njëjta formulë ndiqet edhe për pagën maksimale mesatare që në bazë të përllogaritjeve nuk e kalon nivelin mesatar prej 60 mijë lekë në 35 vite kontribute të paguara.
