Qeveria ka ndryshuar ligjin “Për regjistrimin e pasurive të paluajtshme”, duke detyruar ndërtuesit që të mos shesin ambiente, në rast se leja nuk është e regjistruar në hipotekë. Gjithashtu, ju jepet e drejta bankave që të nxjerrin në shitje karabinanë e ndërtimit, nëse ndërtuesi nuk kthen kredinë raporton Ora News. Kryetari i Shoqatës së Ndërtuesve, Maksim Muçi shpjegon se këto ndryshime synojnë të mbrojnë qytetarët në procesin e shitjblerjes.
Ndërtuesit nuk mund të shesin apartamente apo ambiente biznesi, nëse nuk regjitrohet më parë leja e ndërtimit në hipotekë. Është ky ndryshimi që qeveria ka bërë në ligjin “Për regjistrimin e pasurive të paluajtshme”. Shoqata e Ndërtuesve e vlerëson një nismë të tillë, që mbron qytetarët, por sipas saj, gjithcka do të varet nga pushteti vendor që me ligj duhet të bëjë regjistrimin në hipotekë të lejeve për të mos krijuar vonesa dhe penguar shitjeblerjen në këtë sektor.
Maksim Muci, kryetar i Shoqatës së Ndërtuesve: Regjistrimin në hipotekë duhet ta cojnë organet e pushteti vendor. Ata që kanë lëshuar lejën, pra nuk e çon ndërtuesi, e con bashkia po themi. Këtu ngelet pa zgjidhur kjo pikë, që nëse bashkia vonon dërgimin e lejës atëherë ndërtuesi nuk mund të lidhë kontrata. Pra jemi dakord, nuk ka asnjë kundërshti vetëm se duhet një afat që bashkia duhet të cojë dokumentacionin në zyrën e regjistrim. Regjistrimi i lejës së ndërtimit presupozon që cdo gjë është e fiksuar dhe nuk mundet që as të japësh sipërfaqe më tepër dhe as ti japësh një apartamenti dy veta.
Një tjetër ndryshim që qeveria i ka bërë ligjit është edhe nxjerrja në shitje e karabinasë së ndërtimeve nga bankat, në rast se ndërtuesi nuk e kthen kredinë.
Maksim Muci, kryetar i Shoqatës së Ndërtuesve: Përsa i përket marrëdhënies mes zhvilluesit dhe bankes, këto trajtohen në kontrata mes tyre dhe cdo kontratë e tillë ka fuqinë e ligjit. Ky është problem që varet nga ndërtuesi dhe banka.
Ndërtimi konsiderohet një ndër sektorët më informalë, përsa i përket procesit të shitjeve blerjeve, Janë të shumta rastet kur e njëjta banesë apo ambent i shitet më shumë se një personi./Ora News
