Banka Botërore dhe Autoriteti i Mbikqyrjes Financiare kanë finalizuar draftin e ri që do të detyrojë çdo familje shqiptare të sigurojë shtëpinë nga tërmetet dhe përmbytjet.
Burime për gazetën Panorama janë shprehur se ligji që e bën sigurimin e detyrueshëm, është gati dhe pritet të diskutohet me grupet e interesit. Sigurimi i detyrueshëm i shtëpive ka qenë kërkesë e hershme e Bankës Botërore dhe Fondit Monetar Ndërkombëtar.
Bëhet fjalë për pagesën e një police vjetore, me detyrim, në mënyrë që në rast tërmetesh apo përmbytjesh, qeveria të dalë garant për dëmshpërblimin e banesave të dëmtuara.
Në raportin e saj, Banka Botërore parashikon pagesën prej 50 euro në vit për çdo banesë. “Duke pasur parasysh ekonominë e vogël të Shqipërisë për të mundësuar minimizimin e riskut, duhet që Programi Kombëtar për Sigurimin nga Tërmetet bëhet i detyrueshëm për të gjithë pronarët që kanë një shtëpi”, thuhet në raportin e BB.