Ashtu siç kishte paralajmëruar, qeveria britanike ka ashpërsuar rregullat për shqiptarët që shkojnë në mënyrë të paligjshme në Britani.
Avokati i shqiptarëve në Londër, Naim Hasani foli për Report Tv duke thënë se do të nisi procedurat e përshpejtuara për emigrantët e paligjshëm. Dënimet me burg nuk do të mungojnë pasi emigrimi dhe trafikimi do të konsiderohen si vepra penale.
Ashpërsimi gjatë këtij viti parashikon procedurë të përshpejtuar. Nëse nuk ka arsye të fortë, nuk mund të qëndrojnë në Britani. Për shqiptarët që kërkojnë në azil përshpejtohet procesi. Për të tjerët do të përshpejtohet edhe procedura për t’i kthyer në Shqipëri.
Por ligjet janë ashpërsuar se hyrja në Britani në mënyrë të paligjshme është kthyer në vepër penale që dënohet me 4 vite burg. Nëse je pjesë e një grupi të trafikimit të paligjshëm, dënohesh me 25 vite burg ose dënim të përjetshëm”, tha Hasani.
Ata që tentojnë të udhëtojnë drejt Britanisë në mënyrë të paligjshme rrezikojnë të deportohen në Ruandë. Hasani u shpreh se mesazhi i ambasadës britanike që jep detaje se si do të funksionojë procesi është i qartë dhe ligji zbatohet në Britani.
“Mesazhi i ambasadës britanike është një reagim ekzakt i situatës ligjore të atyre që kanë ardhur dhe tentojnë të vijnë në Britani në mënyrë ilegale me gomone. Shpresoj që mesazhi të jetë i qartë. Britania nuk është vend ku mund të rrezikosh jetën me gomone. Politikat e qeverisë britanike janë të pritshme, është ligj dhe ligji në Britani zbatohet”, tha Hasani.
Sipas qeverisë britanike, emigrantët që do të kërkojnë azil, do të deportohen në Ruandë ku do t’u përpunohet kërkesa. Ruanda do të mbajë përgjegjësi të plotë për ta.
Personat të cilëve u refuzohen kërkesat për mbrojtje, do t’u ofrohet mundësia për të qëndruar në Ruandë ose për t’u kthyer në vendlindje. Ata nuk do të kthehen në MB pasi Ruanda të ketë vendosur për kërkesën e tyre.
