Ndeshjet e fundit në fazën në grupe të Ligës së Kampioneve do të përcaktojnë edhe cilat skuadra do të vazhdojnë rrugëtimin e tyre në turne, kush “zbret nga kategoria” për të përfunduar në Ligën e Europës dhe kush i jep lamtumirën përfundimisht Europës.
Në turin tjetër të Ligës së Kampioneve deri tani kanë kaluar Barcelona, Bajern Mynih, Çelsi, Beshiktash, Mançester Siti, PSG, Real Madrid dhe Totenhem. Në vijim VIP Sport ju tregon kombinimet e ndeshjeve të së martës që përcaktojnë skuadrat e tjera që kualifikohen dhe rendin në grupin përkatës.
GRUPI A
Mançester Junajtid-CSKA Moskë
Benfika-Bazel
Renditja: Mançester Junajtid 12 pikë, Bazel 9, CSKA Moskë 9, Benfika 0.
Mançester Junajtid i duhet një pikë për të siguruar vendin e parë në grup. Edhe nëse mundet dhe Bazeli e CSKA e arrijnë me pikë, diferenca e golave në ndeshjet direkte i mundëson të jetë i qetë për kualifikimin, nëse nuk mundet me 7 gola diferencë.
Bazeli kualifikohet nëse regjistron të njëjtin rezultat me CSKA, cilido qoftë ai, meqë ka një bilanc më të mirë në ndeshjet direkte. Bazeli nuk do të kualifikohej nëse në rast fitoreje të dyfishtë me pikë të barabarta, CSKA do të fitonte me një diferencë nga 3 në 6 gola.
CSKA duhet të bëjë më shumë pikë se Bazeli për t’u kualifikuar. Nëse të dy skuadrat fitojnë, rusëve u duhet të regjistrojnë një diferencë prej 5 golash.
GRUPI B
Bajern Mynih-PSG
Sëlltik-Anderleht
Renditja: PSG 15 pikë, Bajern Mynih 12, Sëlltik 3, Anderleht 0.
PSG dhe Bajern kanë siguruar kualifikimin por luajnë për vendin e parë. PSG ka fituar 3-0 ndeshjen e parë dhe ka një golavarazh të përgjithshëm më të mirë, ndaj Bajern duhet të fitojë me 4 gola diferencë që t’i rrëmbeje vendin e parë.
GRUPI C
Roma-Karabak
Çelsi-Altetiko Madrid
Renditja: Çelsi 10 pikë, Roma 8, Atletiko Madrid 6, Karabak 2.
Çelsi është kualifikuar. Siguron vendin e parë nëse fiton ose nëse Roma nuk merr tri pikët.
Roma kualifikohet me një fitore apo nëse Atletiko nuk fiton. Italianët marrin vendin e parë në grup nëse fitojnë dhe Çelsi nuk e bën një gjë të tillë.
Atletiko duhet të fitojë dhe të shpresojë që Roma nuk merr tri pikët, pasi me pikë të barabarta, spanjollët kanë bilanc më të mirë.
GRUPI D
Olimpiakos-Juventus
Barcelona-Sporting
Renditja: Barcelona 11 pikë, Juventus 8, Sporting 7, Olimpiakos 1.
Barcelona është e kualifikuar si fituese grupi.
Juventusi kualifikohet me një fitore, ose nëse Sporting nuk arrin të fitojë pasi ka një bilanc më të mirë në rast barazie pikësh.
Sporting duhet të fitojë dhe të shpresojë që Juventus nuk e bën një gjë të tillë për t’u kualifikuar.
a.ç
