Sekretari i Përgjithshëm i Partisë Socialiste Taulant Balla, reagon ndaj deklaratës së sotme të kreut të opozitës Lulzim Basha.
Ai e akuzon Lulzim Bashën për shpifje dhe si të lidhur me personat e përfshirë në makinat “Toyota Yaris”, të bllokuara në portin e Durrësit, me 3.4 milionë euro.
“Pas shpifjeve dhe ofendimeve të reja të Lulzim Bashës, tanimë drejtuar gjithë grupit parlamentar, ndërkohë që jemi të bindur se afera e eurove të sekuestruara do të zbardhet plotësisht pasi të kapen autorët në kërkim (me të cilët lidhja e PD është antike ndërsa e Lulzim Bashës me ta është së paku fotografike), po vlerësojmë çuarjen në Gjykatën e Krimeve të Rënda të një padie të tretë, në tre ditë, për gojën e tij të përdale totalisht pas vendimit të Këshillit Europian për datën e negociatave”, shprehet Balla.
Ai shton se, është përditë e më e qartë se përfshirja në debatin e baltës e të llumit me të e me partinë e tij, thjesht na bën pis edhe ne duke lodhur e mërzitur shqiptarët.
Po ashtu shpreh vendosmërinë për tu përfshirë më shumë me opozitën reale, e cila gjendet në territorin ku janë hallet e problemet e njerëzve dhe që është mes njerëzve të zakonshëm që ngrenë zërin sa herë u japim mundësinë e kontaktit me ta.
Balla shton se mazhoranca do të merret me opoziten reale që është në rrjetet sociale e mes grupeve të interesit që presin më shumë nga ne dhe kërkojnë më shumë prej nesh.
“Ndërsa me Lulzim Bashën dhe esadistët e tij ne do të ndjekim gjithnjë e më shumë rrugën gjyqësore të përballjes me shpifjet e ndyra e më gënjeshtrat ofenduese të tyre. Ata tanimë duhet të mësojmë të sjellin prova para publikut ose të turpërohen siç e meritojnë në sallat e gjyqeve”, thotë në mbyllje Taulant Balla.
Më herët gjatë ditës së sotme kryetari i Partisë Demokratike Lulzim Basha iu përgjigj akuzave të kryetarit të grupit të PS Taulant Balla i cili i publikoi dje në Kuvend, një foto ku ai shfaqej me vëllanë e njërit prej personave që të identifikuar si pritësit e 3.4 milionë eurove të sekuestruara.
Ai thotë se nuk e mban mend atë person dhe se mund ta ketë takuar gjatë fushatës kur ndeshet me mijëra njerëz që bën foto.
“Unë takoj mijëra njerëz”, ka thënë Basha.
“Fotoja vërteton se Balla është kapobanda dhe e ka marrë atë foto nga banda e Elbasanit. Unë takoj mijëra njerëz, nuk më ka prezantuar njeri me të, nëse është ai ta marrin ta arrestojnë, ta arrestojnë që sot. Nuk e mbaj mend, disa thotë që ka qenë në kuadër të fushatës së zgjedhjeve të pjesshme në Dibër, por unë takoj me mijëra njerëz, personi në fjalë nuk më thotë asgjë”, tha Basha.
Po ashtu ai shtoi se Taulant Balla është garantuesi i kalimit të parave. /b.d
