Udhëheqësi Suprem i Iranit, Mojtaba Khamenei, përmes një deklarate me shkrim, duke iu referuar Shteteve të Bashkuara të Amerikës dhe Izraelit, ka deklaruar se “Ata përpiqen t’i kthejnë dallimet e ndryshme racore, kulturore, sociale, ekonomike, politike dhe gjeografike në pretekste për të krijuar mosmarrëveshje midis popullit mysliman në Iran dhe në çdo vend tjetër islamik”.
Sipas tij, fuqitë e jashtme synojnë të përfitojnë nga dobësimi i botës islame.
“Nga kjo perspektivë, ata vëzhgojnë fragmentimin e Ummetit Islamik dhe dobësimin e forcave të tij, duke pritur momentin e duhur për të imponuar dominimin e tyre mbi ta”, theksoi Khamenei, duke bërë thirrje që të shmanget çdo veprim që mund të përçajë myslimanët.
Khamenei vuri theksin edhe te çështja e Palestinës dhe siguria rajonale, duke ngritur pikëpyetje mbi mungesën e unitetit: “A do të ishte kombi palestinez i mbetur kaq i pambrojtur, i nënshtruar ndaj shtypjes dhe krimeve të pushtuesve, nëse myslimanët do të ishin të bashkuar dhe do të shtrëngonin grushtat e tyre me forcë?”Ai vazhdoi më tej duke shprehur kritika ndaj vendeve të rajonit: “Dhe a do të kishin guxim kombet dhe qeveritë që jetojnë rreth Gjirit Persik t’i linin keqbërësit e korruptuar dhe pa identitet, nga mijëra kilometra larg, të lakmonin tokat dhe pasuritë e tyre, nëse do të vendosnin unitetin nën flamurin e Islamit?”
Në mbyllje të mesazhit të tij, Lideri Suprem i Iranit u bëri thirrje krerëve të shteteve myslimane që “të njohin armikun e tyre të vërtetë, të kuptojnë planet e tij dhe ta ballafaqojnë atë”.
“Sundimtarët kriminelë të Amerikës dhe regjimi i rremë sionist janë armiq të betuar të këtij uniteti dhe miqësie. Ata nuk janë vetëm armiq të Republikës Islamike, të kombit iranian dhe të frontit të gjerë të rezistencës islame; ata gjithashtu ushqejnë armiqësi ndaj të gjithë botës Myslimane, përfshirë kombet e Azisë Perëndimore dhe Afrikës Veriore”, përfundoi Khamenei.
